नयाँ वर्षको शुभकामना !

लेखक : पुरुषोत्तम पाण्डेय, बुटवल

भुँइमा खसेका
पुराना पातको ऊर्जाले
अस्तित्वका मुनाहरू पलाए झैँ
विगतका अनुभवसँगै
विचारको गाम्भीर्य बोकेर
राराको सौन्दर्य अनुहारमा पोखेर
निश्चल हिमालको मन अनि
अटल पहाडको छाती बोकेर
सम्बोधी आँखा खोल्नू
नदी झैँ अविरल बग्नू
शुभकामना छ तिमीलाई नयाँ वर्षको ।

फूल मात्र होइन जिन्दगी
काँडा र खहरे पनि हो
हो, त्यही काँडा र खहरेमा
बाँच्नेहरूको
भोक, शोक र रोग मेटियोस्
आफ्ना लागि त गरियो, गरिन्छ
सकिन्छ भने
एक पङ्क्ति भए पनि
झुपडी र बगरका
जिन्दगीको कथा लेखियोस्
शुभकामना छ तिमीलाई नयाँ वर्षको

चुचुरोमा पुगेपछि
तल झर्नै पर्छ
पख, सँगसँगै जाऔँला
मान्छे, मान्छे नै त हो
जात, धर्म र लिङ्गको
सीमा किन बाँध्ने ?
आऊ, समसत्ताको मैदानमा
खुसीको होली खेलौँ
भन्न पो बिर्सियो कि ?
अरे….
किन आत्तिन्छौ ?
मौका आएको छ नगुमाउनू
शुभकामना छ तिमीलाई नयाँ वर्षको ।

हो, म मान्छु
सफलता तिम्रो मिहिनेत हो
सफलतासँगै
सम्बन्ध चिसिन सक्छ
अहङ्कारको उन्मादले
उफ्रिएको
अस्तित्वको भँुइचालो
शेषनागले कसरी रोक्न सक्छ
छाडिदेऊ
ती सब काल्पनिक कथा
विगतका तीतापीरा व्यथा
पछि मौका मिल्ला नमिल्ला
लेख्नू,
युगपुरुष बनेर
बस्तीमा हराएका मान्छेहरूको कथा
शुभकामना छ तिमीलाई नयाँ वर्षको ।