बुटवल, १० पुस । आज पौष कृष्ण औंशी तिथि खण्डग्रास सूर्यग्रहण लाग्दै छ । यो खण्डग्रास सूर्यग्रहण नेपाल, भारत, श्रीलंक लगायत एशियाका सबै देश, हिन्दमहासागर, मलेशिया, पूर्वी युरोप, उत्तररपश्चिम अ‘ास्ट्रेलिया, पूर्वी अफ्रीका सहित विश्वका अधिकांश ठाउँबाट देख्न सकिनेछ ।
नेपाली समय अनुसार बिहानको ८ बजेर ४२ मिनेटमा स्पर्श हुने, १० बजेर १ मिनेटमा मध्य हुने र ११ बजेर ३१ मिनेटमा मोक्ष हुने नेपाल पञ्चाङ्ग निर्णायक समितिका अध्यक्ष प्राध्यापक डाक्टर रामचन्द्र गौतमले जानकारी दिनुभयो । उहांका अनुसार खण्डग्रास सूर्यग्रहणको अवधि २ घण्टा ४९ मिनेटको रहनेछ ।
ग्रहण खुल्ला वा चस्मा लगाएर पनि हेर्न हुँदैन । ग्रहणको बेला सूर्यको प्रकाश सिधै आँखामा परेमा सधैँका लागि आँखाको ज्योति गुम्ने खतरा हुने छ ।
शास्त्रका अनुसार सूर्यग्रहणमा ४ प्रहर अर्थात् १२ घण्टा र चन्द्रग्रहणमा ३ प्रहर अर्थात् ९ घण्टा पूर्व सूतक प्रारम्भ हुनेहुदा पुष ९ गतेका दिन राती ८ बजेर ४२ मिनेटदेखि बालक, बृद्ध, रोगी तथा गर्भवती महिलाहरू बाहेक अरू विवेकशिल प्राणिहरूलाई भोजन निषेध गरिएको छ ।
ग्रहणको समयमा हाम्रो घरमा सूर्यको विकिरण तथा नकारात्मक उर्जा घरभित्र प्रवेश हुने भएकाले ग्रहणकालमा पकाएर खानेकुरा राख्नुहुँदैन, यसकासाथै दूध, दही, घ्यू, पानी, अचार आदि छ भने त्यसमा तुलसीपत्र वा कुश राख्नाले त्यस्ता खानेकुरालाई खराब नगर्ने शास्त्रीय मान्यता छ । ग्रहणमा बाह्र राशिको ग्रहणफल यसप्रकार रहेको छ ।
मेष ः मानहानी हुने
वृष ः कष्ट हुने
मिथुन ः स्त्रीपीडा हुने
कर्कट ः सुख मिल्ने
सिंह ः चिन्ता बढ्ने
कन्या ः व्यथा बढ्ने
तुला ः श्री प्राप्ति हुने
बृश्चिक ः क्षति हुने
धनु ः घात हुने
मकर ः खर्च बढ्ने
कुम्भ ः लाभ हुने
मीन ः सुखदायी हुने
