इन्दिरा सुगर मिलको १४ करोड र सुनवलको ११ करोड भुक्तान दिन बाँकी
रामकुमार श्रेष्ठ
नवलपरासी, ९ पुस । नवलपरासीको सुस्ता गाउँपालिका–२ कुडियामा रहेको बागमती खांडसारी मिल सञ्चालनमा आएको छ । उखु उत्पादन कृषक समिति नवलपरासीका अध्यक्ष उमेश यादवले बागमती खांडसारी मिल दुई दिनदेखि सञ्चालनमा आएको बताउनुभयो । उहांले भन्नुभयो – “सरकारले निर्धारण गरेका मूल्यमा आधारित रहेर उखुको मूल्य भुक्तानी दिने गरी मिल सञ्चालनमा आएको हो ।”
नवलपुरमा यस बर्ष १२ लाख क्विन्टल उखु उत्पादन भएको छ । यादवले भन्नुभयो – “किसान आत्तिन पर्ने अवस्था छैन । उखु थोरै उत्पादन भएको छ । गत बर्ष नवलपरासीमा १६ लाख क्विन्टल उखु उत्पादन भएको थियो ।”
नवलपरासी जिल्लामा उखु किसानहरुले समयमै भुक्तान नपाउनु र उखुको उचित मूल्य नपाउनु नै प्रमुख समस्या रहेको छ । नवलपरासीमा रहेका ३ वटा चिनी कारखाना मध्ये लुम्बिनी चिनी मिलले औपचारिक रुपमा यस बर्षदेखि मिल बन्द गरेको जनाएको छ ।
बाँकी रहेका दुई वटा चिनी मिल मध्ये इन्दिरा सुगर मिलमा गत बर्षको रकम भुक्तानीको माग गर्दै स्थानीय किसानहरुले तालाबन्दी गरिदिएका छन् । उखु उत्पादन कृषक समितिका अध्यक्ष यादवका अनुसार पछिल्लो ३ बर्षको १४ करोड रुपैयाँ इन्दिरा सुगर मिलले किसानलाई भुक्तान दिएको छैन । यादवका अनुसार इन्दिरा सुगर मिलको आन्तरिक तयारी पुरा हुन अझै १ महिना लाग्ने देखिन्छ ।
त्यस्तै सुनवल चिनी मिलले गत बर्षको ११ करोड रुपैयाँ किसानहरुलाई भुक्तान नगरी चिनी मिल बन्द गरेको छ । पीडित किसानहरुले सुनवल चिनी मिलका सञ्चालकहरु अहिले सम्पर्कमा नरहेको र किसानहरुलाई रकम भुक्तानी दिन आलटाल गरेको गुनासो गरेका छन् ।
