भलाई कोषका संस्थापक कोषाध्यक्ष शाक्यको निधन

बुटवल, ३० मंसिर । यातायात मजदूर तथा व्यवसायी भलाई कोष बुटवलका संस्थापक कोषाध्यक्ष एवं पुर्व महासचिव जयराज शाक्यको निधन भएको छ ।
७७ वर्षिय शाक्यको हृदयघातका कारण आइतबार राति काठमाडौंमा निधन भएको हो । काठमाडौंस्थित छोरीको घरमा बस्दै आउनुभएका शाक्यलाई बाथरुममा नुहाउने क्रममा अकस्मात हृदयघात भएको थियो । लगत्तै नर्भिक अस्पताल पु¥याइएकोमा चिकित्सकले मृत घोषणा गरेका थिए ।
स्वर्गीय शाक्यका दुई छोरा र एक छोरी छन् । स्वर्गीय शाक्य २०३१ देखि २०३३ सालसम्म भलाई कोषको संस्थापक कोषाध्यक्ष बन्नुभएको थियो । त्यसपछि उहां २०४९ सालसम्म लगातार महासचिव रहेर काम गर्नुभएको थियो । उहांकै परिकल्पना बमोजिम बुटवलमा यातायात मजदूर भलाई कोष स्थापना भएको थियो ।
शाक्यको निधन भएकोमा यातायात मजदूर तथा व्यवसायी भलाई कोष बुटवलले सोमबार श्रद्धाञ्जली सभा सम्पन्न गरेको छ । कार्यक्रममा बोल्दै संघका पुर्व अध्यक्ष एवं मानार्थ सदस्य कुमार थापाले स्वर्गीय शाक्यले भलाई कोष स्थापनामा खेलेको भूमिका महत्वपूर्ण रहेको भन्दै उहांको योगदानलाई संस्थाले कदर गर्नुपर्ने बताउनुभयो ।
कोषका अध्यक्ष दिनेश फुल्लेलले भलाई कोषको स्थापना र संस्थागत विकासमा स्वर्गीय शाक्यले खेलेको भूमिकाको प्रशंसा गर्दै उहांकै योगदानस्वरुप आफूहरु अहिलेको अवस्थामा आइपुगेको बताउनुभयो । उहांले स्वर्गीय शाक्यलाई संस्थाले सधै सम्झिरहने बताउनु भयो । कार्यक्रममा कोषका महासचिव योग गुरुङले स्वर्गीय शाक्यप्रति श्रद्धाञ्जली व्यक्त गर्दै उहांको निधनले कोषलाई ठूलो क्षति पुगेको बताउनुभयो ।