लुम्बिनी १ मंसिर
प्रदेश ५ सरकारका मुख्यमन्त्री शंकर पोखरेलले राज्यलाई बलियो बनाउनुपर्ने बताउनु भएको छ । उहाँले कमजोर राज्यले बलिया र सक्षम नागरिक तयार गर्न नसक्ने बताउनु भयो ।
लुम्बिनी प्रेस क्लब सिद्धार्थनगर रुपन्देहीको आयोजनामा आइतबारदेखि बुद्ध जन्मस्थल लुम्बिनीमा सुरु भएको तीन दिने लुम्बिनी न्यूज फेस्टिबलको उद्घाटन गर्दै मुख्यमन्त्री पोखरेलले कुनै समयमा लोकतन्त्रको स्थापनाको लागि राज्यलाई कमजोर बनाउन अभियानमा लागिए पनि अब लोकतन्त्र प्राप्त भइसकेकोले राज्यलाई बलियो बनाउनतर्फ लाग्नुपर्ने बताउनु भयो । नागरिक सबल र सक्षम हुनैपर्छ, जबसम्म राष्ट्र कमजोर रहन्छ, नागरिकहरु कमजोर रहन्छन्, राज्यलाई बलियो बनाउन सञ्चारमाध्यमको भुमिका महत्वपूर्ण हुन्छ, उहााको कथन थियोे ।
उहाँले समाजमा एक प्रकारले निराशा र आलोचनाका कुराहरु बढो सहज ढंगले विक्री भइरहेको समेत बताउनु भयो । उहाँले नकारात्मक चेतनाले समाजलाई अगाडी बढाउन नसक्ने दावी पनि गर्नु भयो । मुख्यमन्त्री पोखरेलले सञ्चारमाध्यम मानव जगतको महत्वपूर्ण पक्ष भएको बताउदै उहाँले पवित्र भुमि लुम्बिनीमा आयोजना गरिएको कार्यक्रम महत्वपूर्ण भएको धारणा राखनु भयो ।
कार्यक्रममा नेपाल पत्रकार महासंघका अध्यक्ष गोविन्द आचार्यले पत्रकारिताको अबको मिसन भनेको शान्ति र समृद्धि भएको बताउनु भयो । क्लबका अध्यक्ष दिपेश पछाईको अध्यक्षता, उपाध्यक्ष नरेश के.सी.को स्वागत तथा महासचिव सम्झना शर्माको सञ्चालनमा सम्पन्न कार्यक्रममा कार्यक्रम संयोजक दिपेन्द्र बडुवालले न्यूज फेस्टिबलको उद्धेश्यमाथि प्रकाश पार्नु भएको थियो । कार्यक्रममा देशभरीबाट ३ सय पत्रकारहरुको सहभागिता रहेको फेस्टिबलका सूचना तथा सञ्चार उपसमिति संयोजक रबिन्द्र प्रताप गुप्ताले बताउनु भयो ।
