गुल्मी, ७ जेठ । रूपन्देहीको तिलोत्तमास्थित क्रिमसन अस्पतालको आइसियूमा भेण्टिलेटरको सहायतामा उपचाररत गुल्मीका कोरोना भाइरस संक्रमित पुरुषले शिक्षण गर्ने विद्यालयमा क्वारेण्टाइन स्थापना नगरिएको गुल्मीको मदाने गाउँपालिकाले जनाएको छ ।
गुल्मीको मदाने गाउँपालिका वडा नं. ६ निवासी ४१ ब्र्षिय पुरुष कहिल्यै पनि क्वारेण्टाइनमा खाना पुर्याउन जाने काम नगरेको र लकडाउन अवधिभर घरमै रहनुभएका स्वास्थ्य प्रति सचेत नागरिकलाई कसरी कोभिड १९ पोजेटिभ देखियो भन्ने विषयमा अध्ययन भैरहेको गाउँपालिकाले विज्ञप्ति जारी गरी जनाएको छ ।
मदाने गाउँपालिकाका प्रमुख प्रशासकीय अधिकृत सुरेश भण्डारीले आज (बुधबार) दिउँसो एक विज्ञप्ति प्रकाशित गरि उहांको हालको स्वास्थ्य अवस्था र घर नजिकै क्वारेण्टाइन थियो भन्ने भ्रामक समाचार प्रशारणबाट हामी अत्यन्तै दुखित भएका छांै भन्नुभएको छ ।
‘जोखिमको यस समयमा सम्पुर्ण मदाने गाउँपालिका वासि बुवा, आमा, दाजु, भाई, दिदी बहिनीहरुलाई धैर्यता पुर्वक रहनु हुन र कोभिड १९ विरुद्धका सुरक्षाका उपायहरु ऋपनाउनुहुन सादर अनुरोध गर्दछौं ।’ विज्ञप्तिमा उल्लेख गरिएको छ ।
४१ बर्षिय शिक्षक रूपन्देहीको क्रिमसन अस्पतालमा उपचार गराइरहेको र उहाँको जेठ ५ गते प्रादेशिक जन स्वास्थ्य प्रयोगशाला रुपन्देहीमा गरिएको परीक्षणमा कोभिड–१९ पोजेटिभ आएको र हाल उहांको क्रिमसन अस्पतालमा भेण्टिलेटरको सहायतामा उपचार भैरहेको गाउँपालिकाले जारी गरेको विज्ञप्तिमा उल्लेख छ । पालिकाले विरामीको शिघ्र स्वास्थ्य लाभको कामना समेत गरेको छ ।
बुधबार दिउँसो विज्ञप्ति जारी गर्दै क्रिमसन अस्पतालले पनि ती बिरामीको भेन्टिलेटरको सहायतामा उपचार भइरहेको बताएको छ ।
अस्पतालमा उपचाररत विरामीको बुधबार मृत्यु भएको भनी विभिन्न संचार माध्यममा समाचार प्रकाशन भएपछि अस्पतालले विज्ञप्ति जारी गरेर समाचार निराधार रहेको र विरामीको उपचार भैरहेको वताएको हो ।
