रुपन्देही र कपिलवस्तुका १२ जनामा संक्रमण पुष्टि
बुटवल, २९ बैशाख । नेपालमा कोरोना संक्रमितको संख्या १३४ पुगेको छ । सोमबार साँझ १३ जनामा कोरोना पुष्टि भएसंगै संक्रमितको संख्या १३४ पुगेको स्वास्थ्य तथा जनसंख्या मन्त्रालयले जानकारी गराएको छ ।
मन्त्रालयका अनुसार रुपन्देहीमा ६, कपिलवस्तुमा ६ र बर्दियामा १ जनामा कोरोना संक्रमण पुष्टि भएको हो । कपिलवस्तुको यशोधरा गाउँपालिका– ८ र वुद्धभूमि नगरपालिका–७ का १५, १९, २३, ३०, ३२ र ३८ वर्षका पुरुषमा कोरोना संक्रमण देखिएको हो । त्यस्तै रुपन्देहीको सम्मरीमाइ गाउँपालिका–७ ४ र लुम्बिनी साँस्कृतिक गाउँपालिका ६ का २ जनामा कोरोना संक्रमण पुष्टि भएको स्वास्थ्य कार्यालय रुपन्देहीका प्रमुख डा. राजेन्द्र गिरीले जानकारी दिनुभयो । उनीहरु २४, २६, २७, ३०, ३२ र ४० वर्षका पुरुष हुन् । सोमबार विहानमात्रै कपिलवस्तुमा १० जनामा कोरोना संक्रमण पुष्टि भएको थियो । बर्दिया राजापुर नगरपालिका–५ कि ११ वर्षकी बालिकामा पनि कोरोना संक्रमण देखिएको छ ।
सोमबार कोरोना संक्रमण पुष्टि भएका रुपन्देहीको सम्मरीमाई गाउँपालिकाका चार जना र लुम्बिनी सांस्कृतिक नगरपालिकाका दुई जना भारतबाट लुकेर आएको खुलेको छ । स्वास्थ्य कार्यालयका प्रमुख डा. गिरीका अनुसार संक्रमण पुष्टि भएका ६ जना सम्वन्धित स्थानीय पालिकाको क्वारेण्टाइनमा रहेका छन् । उहांका अनुसार कोृरोना संक्रमण पुष्टि भएकाहरु केही दिन अघि सुरक्षाकर्मीलाई छलेर भारतवाट नेपाल भित्रिएका थिए ।
यस अघि संक्रमण पुष्टि भएका रुपन्देहीको कोटहीमाई गाउँपालिकाका युवा पनि भारतवाट लुकेर भित्रिएका थिए ।
