६ सय किलो धानको विउ र गहुं शसस्त्र प्रहरीद्वार वरामद
भैरहवा, २६ बैशाख । मुलक लकडाउनमा रहेको छ । नेपाल र भारत दुवै देशले आ–आफ्नो सीमा बन्द गरेका छन् । दुवै देशको सीमाबाट आवागमन अहिले गैरकानूनी भएको छ । यस्तो अवस्थामा पनि दुवै देशका केही अपराधिक मनोवृत्तिका ब्यक्तिहरुका लागि भने यो समय अवसर बनेको छ ।
लकडाउनकै समयमा भारतबाट अवैध रुपमा ल्याउदै गरेको कृषि सामाग्री शसस्त्र प्रहरीले बरामद गरेको छ । नेपालमा प्रशस्त बिउ बिजन भए पनि तस्करी गरि भारतबाट अबैधरुपमा ल्याउंदै गरेको भारतीय धानको बिउ शसस्त्र प्रहरीले बरामद गरेको हो ।
रोहिणी गाउँपालिका वडा नम्बर २ खुरहुरियामा शसस्त्र प्रहरी बल पजरकट्टी बेस क्याम्पबाट खटिएको टोलीले लु २ त ८३७७ नम्बरको ट्रयाक्टरमा भारतबाट ल्याउदै गरेको अवस्थामा ६ सय किलो भारतीय धानको बिउ, स्थानीय गहुं २ हजार १ सय ४२ किलो र डिजिटल तराजु १ थान बरामद गरेको छ । शसस्त्र प्रहरी निरिक्षक शुसिलबाबु पन्तको कमाण्डमा खटिएको टोलीले उक्त सामाग्री बरामद गरेको हो ।
लकडाउनको फाईदा उठाउदै सीमानाकाका अवैध कारोबारीहरु अहिले सल्बलाएका छन् । नेपालबाट भारी मात्रामा मदिरा भारत तर्फ पठाउने र भारतबाट मल, धानको बिउ लगायत अन्य सामाग्रीहरुको ओसार प्रसार बढेको गुनासोको आधारमा शसस्त्र प्रहरीले सीमामा निगरानी बढाएको छ ।
अहिले सीमा नाकामा ठाउँ ठाउँमा शसस्त्र प्रहरीको गस्ती छ । तत्कालको लागि स्थायी रुपमा सब बेसहरु बनाएर बसेको शसस्त्र प्रहरीको आँखा छलेर कसरी यस्ता सामाग्री नेपाल भित्रिएको छ त्यो भने शंकाकै बिषय रहेको छ । यसरी अवैध रुपमा आउने सामाग्रीले लकडाउनको उल्लंघन गर्नुको साथै कोरोनाको त्रास समेत उत्तिकै बढाएको छ ।
