लुम्विनी, २५ बैशाख । आज वैशाख शुक्ल पूर्णिमा अर्थात २५६४ औँ बुद्ध जयन्ती । तर यस वर्ष विगतका वर्षमा जस्तो लुम्विनीमा कुनै कार्यक्रम गरिएन । कोरोना भाइरसका कारण २५६४ औं बुद्धजयन्ती तथा तेस्रो अन्तर्राष्ट्रिय बौद्ध सम्मेलनको औपचारिक कार्यक्रम स्थगित गरिएको हो ।
नेपाल सरकारबाट कोरोना भाइरस(कोभिड–१९) रोकथाम तथा नियन्त्रणका लागि जारी निर्देशन अनुसार २५६४ औं बुद्ध जयन्ती तथा तेस्रो अन्तर्राष्ट्रिय बौद्ध सम्मेलनका सबै औपचारिक कार्यक्रम स्थगित गरिएको लुम्विनी विकाष कोषले जनाएको छ ।
गौतम बुद्धको जन्म, बुद्धत्व प्राप्ति र महापरिनिर्वाण प्राप्ति (निधन) भएको वैशाख शुक्ल पूर्णिमाको दिनलाई बौद्ध धर्मावलम्बीले बुद्ध जयन्तीका रुपमा श्रद्धापुर्वक मनाउने गर्छन् । नेपालको लुम्बिनीमा इसापूर्व ५६३ अर्थात् आजभन्दा २५६४ वर्षअघि सिद्धार्थ गौतमको जन्म वैशाख शुक्ल पूर्णिमाकै दिनमा भएको थियो ।
हरेक वर्ष बुद्ध जयन्तीका दिन बुद्ध जन्मस्थल लुम्बिनीमा मायादेवी मन्दिरको दर्शन, पूजापाठ र प्रार्थन लगायतका औपचारिक कार्यक्रमहरु हुने गरेपनि आज लुम्बिनीमा दर्शनार्थी र आगन्तुकको कुनै चहलपहल र रौनक देखिएन ।
बुद्ध जयन्तीका अवसरमा बुद्धको पवित्र जन्मस्थल लुम्बिनी स्थित मायादेवी मन्दिर परिसरमा आज (बिहीबार) बिहान सामाजिक दुरी कायम गरी बौद्ध भिक्षु–भिक्षुणी, लामा तथा गुरु–गुरुआमाहरुबाट विश्व शान्तिको कामना गर्दै प्रार्थना गरिएको थियो ।
आजै सांझ सिमित ब्यक्तिको उपस्थितिमा पूजापाठसहित २५ सय ६४ वटा दीप प्रज्वलन गरिएको थियो ।
