रामकुमार श्रेष्ठ
नवलपरासी, १ बैशाख । भारतको दिल्लीमा भएको निजामुद्धीन तब्लिकी जमातको सभाबाट भागेर सुस्ता हुदै पैदल नेपाल छिरेका दुई जनालाई नवलपरासीमा स्थानीयले समातेर भारतीय प्रहरीलाई बुझाएका छन् ।
भारतबाट हिडेर सुस्ताको बाटो हुंदै नेपाल छिर्दै गरेका सुनसरी इनरुवा नगरपालिका कपडि बस्ने ६५ वर्षका अब्दुल मिया र सलमान मियालाई नियन्त्रणमा लिएर स्थानीयले भारतीय प्रहरीको जिम्मा लगाएको स्थानीय अंगद यादबले जानकारी दिनुभयो ।
उनीहरु सभा सकिएको २१ दिनपछि भारतको महाराजगंजको करमिसवा हुदै नेपालको सुस्ता हुँदै नवलपरासी छिरेको बेला सोमवार बिहान ६ बजे स्थानीयले नियन्त्रणमा लिएका हुन् ।
सुस्ता गाउँपालिका वडा नम्बर ५ का वडा अध्यक्ष प्रभुनाथ यादबको टोलीले उनीहरुलाई नियन्त्रणमा लिएर भारतीय सुरक्षाकर्मीलाई बुझाइदिएको अध्यक्ष यादवले बताउनु भयो ।
नेपाल छिर्नु अघि सुस्तामा भारतीय सुरक्षाकर्मी (भारत तर्फका)ले उनीहरुलाई नेपाल प्रबेश गर्न दिएका थिए । वडा अध्यक्ष यादवले उनीहरु नेपाल छिरेको जानकारी स्थानीयले दिनासाथ बिहानै समातेर भारतीय सुरक्षाकर्मीलाई बुझाइदिएका थिए ।
उक्त सभामा सहभागी भएका तर लकडाउन र सीमा नाका बन्दका कारण नेपाल छिर्न नपाएका अझै कैयौं नेपालभारत सिमा नाका आसपासमा रहेका मस्जिदमा लुकेर बसेको आशंका गरिएको छ ।
पश्चिम नवलपरासीमा नेपाल भारत खुल्ला सिमा नाकाका साथै खेतबारीबाट पनि प्रवेश गर्न मिल्ने प्रशस्त गोरेटो बाटोहरु भएका कारण सीमा नजिकै घर रहेका नेपाली र भारतीयहरुको आउजाउ अझै पनि जारी रहेको स्थानीय रविन्द्र यावदले बताउनु भयो ।
विशेष गरेर रातको समयमा भारतमा रहेका नेपालीहरु यस्तो बाटो प्रयोग गरेर नेपाल छिर्ने गरेपछि नेपाली स्थानीय बासिन्दा र प्रहरीले निगरानी बढाएका छन् । सीमा क्षेत्रमा सशस्त्र प्रहरीको गस्ती र चेकिङ्ग पोष्टहरु समेत बढाइएको छ । त्यसैगरी सीमा क्षेत्रमा रातिको समय अँध्यारोको फाइदा उठाउँदै हिड्न सक्ने भएकोले त्यस्तो बाटोहरुमा विजुली बत्ति समेत जडान गरिएको छ ।
