लुम्बिनी, २ बैसाख । रुपन्देहीको लुम्बिनी सांस्कृतिक नगरपालिकाको लुम्बिनीमा वृहत रक्तदान कार्यक्रम सम्पन्न भएको छ । लुम्बिनी नव युवा क्लबको आयोजनामा भएको कार्यक्रमको शुभारम्भ प्रदेश सभा सांसद फखरुद्दिन खानले रक्तदान गरेर गर्नुभएको थियो ।
नेपाल रेडक्रस सोसाइटी लुम्बिनी उपशाखाको प्राविधिक सहयोगमा भएको कार्यक्रममा प्रमुख अतिथि नेपाली काँग्रेसका नेता समेत रहेका सांसद खानसहित ४७ जनाले रक्तदान गरेका छन् । सो अवसरमा बोल्दै सांसद खानले विश्वव्यापी महामारीका रुपमा फैलिएको कोरोना भाइरस संक्रमणबाट बच्न लकडाउनको पूर्ण पालना गरी घरमै बस्न आग्रह गर्दै यसको रोकथाम, उपचार र विपन्न वर्गलाई राहतको व्यवस्थामा सरकारले विपक्षी दलहरुसंग सहकार्य गरेर जानुपर्नेमा जोड दिनुभयो ।
क्लबका अध्यक्ष अहमद हुसेनले नयाँ वर्ष २०७७ को अवसर पारेर लुम्बिनी क्षेत्रका प्रदेश सांसद खानको सुझाव अनुसार रक्तदान आयोजना गरिएको र लकडाउनका वावजुद पनि कार्यक्रम सफल भएको बताउनु भयो ।
