परासी, १ बैशाख । नेपाली काँग्रेस जिल्ला समिति पश्चिम नवलपरासीले जिल्लाका सबै ७ स्थानीय तहलाई पीपीई उपलब्ध गराएको छ । उपलब्ध गराइएको पीपीईको मूल्य २ लाख ५० हजार रुपैयाँ रहेको छ ।
त्रिभुवन क्याम्पस बेलाटारी पश्चिम नवलपरासीका पूर्व स्ववियू इकाई सभापति चन्द्रकान्त खनालले उपलब्ध गराएको पीपीई पार्टीका जिल्ला कार्यबाहक सभापति अर्जुनकुमार पोखरेलको नेतृत्वमा पुगेको पूर्व संविधासभा सदस्यद्धय देवकरण कलवार, विक्रम खनाललगायतको टोलीले सोमबार स्थानीय तहहरुलाई हस्तान्तरण गरेको हो ।
भारतीय सीमासँग जोडिएको पश्चिम जिल्ला कोरोना संक्रमणको उच्च जोखिममा रहेको छ । जिल्लामा पीपीई अपुग रहेको जानकारी आएपछि स्थानीय तह मार्फत उक्त सामाग्री उपलब्ध गराइएको काँग्रेसका कार्यबाहक सभापति पोखरेलले बताउनुभयो । उपलब्ध गराइएका पीपीईमा सुनवल नगरपालिकालाई २० थान छ । त्यसैगरी रामग्राम र बर्दघाट नगरपालिकालाई १५÷१५ थान, प्रतापपुर, सुस्ता, पाल्हीनन्दन र सरावल गाउँपालिकालाई १०÷१० थान प्रदान गरिएको छ ।
त्यसैगरी एम्बुलेन्स चालकका लागि ५ थान र आवश्यक परेका बेला उपलब्ध गराउन भन्दै प्रमुख जिल्ला अधिकारी बासुदेव दाहाल मार्फत जिल्ला विपद् व्यवस्थापन समितिलाई ५ थान पीपीई उपलब्ध गराइएको छ । उपलब्ध गराइएको पीपीई डबल कभरसहित एयर टाईट र वाटर पु्रफ रहेको पृथ्वीचन्द्र जिल्ला अस्पताल परासीका मेडिकल सुपरिटेण्डेण्ट डा. मोहम्मद नुरुल होलाले बताउनु भयो । ‘यो पीपीई धोएर पुन लगाउन मिल्नुका साथै सेनिटाईजर गरेपछि आइसोलेसन कक्षमा पनि प्रयोग गर्ने खालको छ ।’ उहांले भन्नुभयो ।
