धकधई, २३ चैत । रोहिणी गाउँपालिकाले गरिब, विपन्नलाई राहत वितरण सुरु गरेको छ । कोरोना भाईरसको जोखिम न्यूनिकरण गर्न सरकारले लागु गरेको लकडाउन लम्बिए संगै गरिब तथा विपन्न वर्गका जनतालाई अप्ठेरो परेकोले राहत वितरण सुरु गरिएको हो ।
गाउँपालिकाले गठन गरेको विपद् ब्यवस्थापन समितिको बैठकले राहत बितरण गर्ने निर्णय गरेसंगै राहत वितरण गर्न सुरु गरिएको हो । पहिलो चरणमा गाउँपालिकाको वडा नम्बर २ र ३ बाट राहत बितरण सुरु गरिएको राहत बितरण संयोजक राजकुमार मिश्रले जानकारी दिनुभयो । एउटा वडामा २ सय घरधुरीको दरले राहत बितरण गरिएको र यसलाई आवश्यकता अनुसार आगामी दिनमा बढाउन सकिने संयोजक मिश्रले बताउनु भयो ।
गाउँपालिकाले राहत बितरण सम्बन्धि निर्देशिका नै बनाएर सोही अनुसार राहत बितरण गरेको छ । गाउँपालिकाले प्रति परिवार १० किलो चामल, ५ किलो पिठो, १ किलो दाल, १ लिटर तेल, १ पोका नून, ४ सय ग्राम सोयाबिन, ४ किलो आलु र १ किलो प्याज बितरण गरिरहेको छ । प्रथम चरणमा श्रमिकवर्ग, असहाय, गरिब तथा उनीहरुसंग सम्बन्धित ब्यक्तिहरुका लागि राहत बितरण गरिएको छ ।
राहत बितरण कार्यमा गाउँपालिकाका पदाधिकारी भने सहभागि भएका छैनन् । गाउँपालिकाका पदाधिकारी जांदा भिड बढ्ने भन्दै कर्मचारीहरु परिचालन गरेर राहत पाउनेको घर घरमै पुगेर राहत बितरण गरिएको रोहिणी गाउँपालिका अध्यक्ष सनोज कुमार यादवले जानकारी दिनुभयो ।
अहिले १ हजार ४ सय घरधुरीलाई पुग्ने गरि प्याकेट तयार गरिएको र सोही अनुसार बितरण गरिएको बताउदै अध्यक्ष्य यादवले गाउँपालिका भित्र रहेका सम्पूर्ण गरिब तथा असहायलाई पुग्ने गरि राहत बितरण गरिने जानकारी दिनुभयो ।
राहत पाएपछि स्थानीयहरुले राहतको महशुस गरेका छन् । दैनिक ज्याला मजदुरीमा भर परेका मजदुरहरु लकडाउनको कारण काममा जान पाएका छैनन् । घरमा राखेको खाद्यान्न पनि सकिएपछि चिन्तित रहेका उनीहरुमा गाउँपालिकाको राहत सामाग्रीले केही राहत मिलेको छ ।
