काठमाडौं, ९ चैत । सरकारले छिमेकी भारत र चीनका नाका एक साताका लागि बन्द गर्ने निर्णय गरेको छ । आइतबार साँझ प्रधानमन्त्री केपी शर्मा ओलीको अध्यक्षतामा बालुवाटारमा बसेको मन्त्रिपरिषद् बैठकले भोलि चैत १० गते सोमबारदेखि भारत र चीनतर्फका सबै नाका बन्द गर्ने निर्णय गरेको हो ।
विश्वव्यापी बनेको कोरोना भाइरस (कोभिड— १९) को संक्रमणलाई नियन्त्रण गर्न सरकारले यस्तो निर्णय गरेको सरकारका प्रवक्ता मन्त्री युवराज खतिवडाले जानकारी गराउनु भयो । उहांका अनुसार बन्दका क्रममा सामान आयात निर्यातका काम भने जारी रहने छ ।
सरकारले कोरोना संक्रमणको महामारीविरुद्ध लड्न तथा उपचार र औषधि सहज बनाउन राहत कोष स्थापना गर्ने निर्णय समेत गरेको छ । उक्त कोषमा सरकारको तर्फबाट ५० करोड रुपैयाँ जम्मा गर्ने निर्णय भएको र कोषमा मन्त्रिपरिषदका सदश्यहरुले एक महिनाको तलब जम्मा गर्ने भएका छन् ।
