५० प्रतिशत अनुदानमा फलफूलका विरुवा

भैरहवा, २४ असार । सिद्धार्थनगर नगरपालिकाले चालु आर्थिक वर्षभित्रै दुई हजार पाँच सय फलफूलका विरुवा ५० प्रतिशत अनुदानमा वितरण गर्ने भएको छ । नगरपालिकाको ५० प्रतिशत र सम्बन्धित व्यक्तिको ५० प्रतिशत गरि अनुदानमा फलफूलका विरुवा वितरण सुरु गरिएको उपप्रमुख उमा काफ्लेले बताइन् । अहिलेसम्म ९ सय विरुवा वितरण गरिसकिएको नगरपालिकाले जनाएको छ । ढिलो वर्षा भएकाले वितरणमा पनि ढिलाई भएको नगरपालिकाका कृषि विकास अधिकृत अलाउद्दिन खाँले जानकारी दिए ।
नगरपालिकालाई हराभरा बनाउने, कृषकलाई आत्मनिर्भर बनाउने, स्थानीय स्तरमा फलफूल उत्पादन गरी आयात रोक्ने र रोजगारी सिर्जना गर्ने उद्देश्यले फलफूलका विरुवा वितरण सुरु गरिएको उपप्रमुख काफ्लेले बताइन् ।
नगरपालिकाले मंगलबार मात्रै विभिन्न फलफूलका ४ सय बढी विरुवा वितरण गरेको छ । आँप, लिची, अमला, मेवा, कागती, अनार, अंगुर, कटहर, अम्वा, जामुन, एभोकाँडे, हलुवा वेद लगायत विभिन्न कलमी जातका फलफूल वितरण गर्दै आएको कृषि अधिकृत योगेन्द्रप्रसाद यादवले जनाए । अहिलेसम्म नगरपालिकाको वडा नं. १, २, ३, ८, ९, १० र ११ का धेरै कृषकलाई फलफूलका विरुवा वितरण गरिसकेको छ ।
आगामी आर्थिक वर्षलाई वृक्षारोपण वर्ष बनाउने नगरपालिकाले योजना अन्तर्गत चालु आवबाटै विरुवा वितरण गरिएको हो । प्रमुख प्रशासकीय अधिकृत ख्यामबहादुर थापाका अनुसार वृक्षारोपण गर्दा फलफूलका विरुवालाई प्राथमिकता दिइएको छ । उनले सम्भव भएसम्म सबै कृषक तथा नगरबासीलाई फलफूलका विरुवा नै रोप्न आग्रह गरे । आगामी आवमा नगरपालिकाले करिब १० हजार फलफूलका विरुवा अनुदान सहयोगमा वितरण गर्ने योजना बनाएको छ । सबै विरुवा हुर्किएमा नगरमा आयात हुने फलफूल आयात प्रतिस्थापन हुने विश्वास लिइएको छ । फलफूलका विरुवाबाट स्वच्छ हावा पाउनुका साथै नगर सुन्दरीकरण समेत हुने भएकाले सबैलाई फलफूलका विरुवा नै रोप्न नगरपालिकाले आग्रह गरेको छ ।