बुद्ध मूर्तिका लागि टाइगर प्यालेस र इन्भेष्टमेण्ट बैंकको सहयोग

भैरहवा, २४ असार । सिद्धार्थनगर नगरपालिका क्षेत्रभित्र बुद्ध मूर्ति राख्न नगरपालिकाले थालेको अभियानलाई साथ दिने उद्देश्यले कोटीहवामा रहेको टाइगर प्यालेस रिसोर्ट र नेपाल इनभेष्टमेन्ट बैं लि. ले आर्थिक सहयोग गरेका छन् । मंगलबार रिसोर्ट र बैंकले नगरपालिकाद्वारा गठित उपभोक्ता समितिलाई नगद ३ लाख ६५ हजारका दरले ७ लाख ३० हजार रुपैयाँ सहयोग गरेका हुन् । अहिले नगरपालिकाले बेलहिया बुटवल ६ लेन सडकको बीच भागमा बुद्ध मूर्ति राखिरहेको छ । नगरपालिकाले चालु आबमा २० लाख रुपैयाँ छुट्याएर मूर्ति राखिरहेको छ ।
नगरपालिकाले २० लाखबाट ६ वटा मूर्ति असारभित्रै राखिसक्ने नगर प्रमुख हरिप्रसाद अधिकारीले बताए । अहिलेसम्म ५ वटा मूर्ति राखिएको छ । सीमा नाका बेलहियाबाट अंचलपुरसम्म आगामी आर्थिक वर्ष ०७६÷७७ मा २३ वटा मूर्ति राख्ने नगरपालिकाको योजना छ । त्यसका लागि विभिन्न संघसंस्थालाई सहयोग गर्न नगरपालिकाले आह्वान गरेको छ ।
नगरपालिकाले बुद्ध मूर्ति व्यवस्थापन उपभोक्ता समितिमार्फत् काम गरिरहेको छ । इनभेष्टमेन्ट बैंकका पाँच नम्बर प्रदेश प्रमुख रामराज उपाध्यायले नगर प्रमुख हरिप्रसाद अधिकारी, उपप्रमुख उमा काफ्ले र उपभोक्ता समिति अध्यक्ष भरतकुमार पोखरेललाई ३ लाख ६५ हजारको चेक प्रदान गरेका हुन् । नगरपालिकाले बुद्ध नगरी बनाउन थालेको अभियानलाई साथ दिन बैंकको सामाजिक उत्तर दायित्व अन्तर्गत सहयोग गरिएको उपाध्यायले जानकारी दिए ।
टाइगर प्लोसका महाप्रबन्धक वलिभर केरुटेज र फाइनान्स व्यवस्थापक लक्ष्मण थापाले उपभोक्ता समिति अध्यक्ष पोखरेललाई ३ लाख ६५ हजारको चेक प्रदान गरे । लुम्बिनी आउने पर्यटकको आकर्षणलाई बढाउन नगरपालिकाले योजना सफल पार्न रिसोर्टले सहयोग गरेको महाप्रबन्धक केरुटेजले बताए । पहेँलो धातुबाट निर्मित एउटा बुद्ध मूर्ति राख्न करिब ३ लाख ६५ हजार खर्च लाग्ने नगरपालिकाले जनाएको छ । समाजिक काममा सबैले साथ दिए नगरपालिकाको योजना सफल हुने समिति अध्यक्ष पोखरेलले जनाए । उनले नगरलाई बुद्धमय बनाउन सबैको सहयोग उत्तिकै आवश्यकता रहेको औल्याए ।