तिलोत्तमा मेला एक दिन लम्बियो

बुटवल, २० माघ । ‘तिलोत्तमामा लगानी ः समृद्धिको सुनौलो बिहानी’ नारासहित मणिग्राममा जारी दोस्रो राष्ट्रिय औद्योगिक ब्यापार मेलाको अवधि एक दिन थप भएको छ । सोमबार मेला सचिवालयमा बसेको आयोजक संस्थाको कार्यसमितिको वैठकले मेला अवधि एक दिन थप्ने निर्णय गरेको हो । माघ २१ गते समापन हुने भनिएको मेला स्टल धनीहरुको आग्रहमा एक दिन थप गरी २२ गतेसम्म सञ्चालन गर्ने निर्णय भएको आयोजकले जनाएका छन् । समापनका दिन २२ गते दिउसो ३ बजेखदेखि मेला प्रवेश निःशुल्क गरिएको तिलोत्तमा उद्योग वाणिज्य संघका अध्यक्ष माधव भण्डारीले बताउनु भयो । एघारौं दिनसम्म तीन लाख दर्शकले मेलाको अवलेकन गरेका र १२ करोड रुपैयां भन्दा बढीको कारोबार भएको कोषाध्यक्ष सुरज पंगेनीले जानकारी दिनु भयो । मेला सकिन लाग्दा किनमेल र मनोरन्जनका लागि दर्शकको भीड बढ्दै गएको संघका महासचिव कमल प्रसाद कंडेलले बताउनु भयो । सोमबार रामजी खांण,सिर्जु अधिकारी र दुर्गेश थापाको प्रस्तुतीमा दर्शकहरु झुमेका थिए । सोमबार नै विभिन्न दलका नेताहरु, उद्योगी व्यवसायिका संघसंस्थाका प्रतिनिधिहरुले मेला अवलोकन गरेका थिए । मंगलबार तिलोत्तमा डान्स आइडलको फाइनल प्रतिस्पर्धा हुने छ भने सांस्कृतिक कार्यक्रमतर्फ चर्चित गायक पशुपति शर्मा, आरती रुचाल, शिव खनाल लगायको प्रस्तुति रहने सांस्कृतिक कार्यक्रम संयोजक धनबहादुर गुरुङले बताउनु भयो ।