आमा सेमिनारमा सहभागि सबैको आँखाबाट आँसु छचल्कियो

मणिग्राम, १३ मंसिर । मानवसेवा आश्रमले बुटवलमा आयोजना गरेको आमा सेमिनारमा सहभागि सबैको आँखाबाट आँसु छचल्किएको छ । कार्यक्रममा सहभागिहरु सबैको आँखामा आँसु रसाउनुका साथै मातृत्व छचल्किएको थियो । मातृत्व र मातृभूमिको सम्मानमा मानवता प्रवद्र्धनको लक्ष्य राखेर मानवसेवा आश्रमले आमा सेमिनार कार्यक्रम आयोजना गरेको हो ।
आमा सेमिनारलाई मानवसेवा आश्रमका संस्थापक केन्द्रीय अध्यक्ष तथा प्रमुख उत्प्रेरक रामजी अधिकारीको मातृत्व र मातृभूमिको सम्मानमा गर्नुभएको उत्प्रेरणात्मक प्रवचन र विभिन्न मर्मस्पर्षी प्रसंगहरुले सहभागीहरुको आँखा रसाउनुका साथै धेरैको मन जितेको थियो । कार्यक्रम अवधिभर आँखा नरसाउने र खित्का छाडेर नहाँस्ने सहभागी सम्भवत कोही रहेनन् ।
कार्यक्रममा अधिकारीको प्रस्तुतिमा सबै सहभागीहरुले आफूलाई जन्मदिने माता पितालाई सम्झिए, मातृवात्सल्यता र पितृ स्नेहलाई महसुश गरे, जीवनको विभिन्न पहलुहरुमा आमा बुबालाई आफुले जानेर नजानेर मन दुःखाएको क्षणलाई सम्झिएर पश्चाताप गरे, अब उप्रान्त भुलेरपनि मन नदुःखाउने प्रण गरे ।

सेमिनारमा मानवसेवा आश्रमका अभियन्ताहरुले तयार पारेको नाटक “जीउँदो देवता” मञ्चन गरिएको थियो । नाटक शुुभारम्भ भएपछि धेरैजसो सहभागि डाँको छोडेर रोए भने कलाकारको प्रस्तुतिले समेत सबै सहभागीहरुलाई नतमस्तक बनायो ।

२५० जना अट्ने क्षमता रहेको हलमा करिब ४ सय ५० जनाको सहभागिता रहेको थियो । उकुस मुकुस र अटसमटसको हलमा पनि कार्यक्रमले साँघुरो र अप्ठ्यारोको महसुस कसैले गरेन । दिउसो १ बजे कार्यक्रम हलभित्र प्रवेश गरेका सहभागिहरु सांझ साढे ५ बजेसम्म हलचल नगरेर बसे ।
कर्यक्रममा आयोजकका तर्फबाट चिया नास्ताको कुनै प्रवन्ध गरिएको थिएन । तरपनि बोलाइएको भन्दा धेरै सहभागीहरु कार्यक्रममा सहभागि थिए भने सहभागि सबै कार्यक्रमको अन्त्य सम्म बसेर साथ दिए ।