रामकुमार श्रेष्ठ
नवलपरासी, ११ माघ । नवलपरासीमा शनिबार भएका छुट्टा छुट्टै घटनामा परी ३ जनाको मृत्यु भएको छ । गैडाकोट र त्रिवेणीमा भएका तीन वटा घटनामा तीन जनाको मृत्यु भएको हो ।
पूर्वी नवलपरासीको गैडाकोटमा शुक्रबारराति टिप्परको ठक्करबाट एक जनाको निधन भएको छ ।
गैडाकोट ८ मौलाकालिका होटेल अगाडि ना १ क ८३३० नम्बरको टिप्परले विपरित दिशाबाट आउँदै गरेको बा ६७ प ७८८२ नम्बरको मोटरसाईकललाई ठक्कर दिंदा मोटरसाईकल चालक रूपन्देहीको देवदह शितलनगर बस्ने ३५ बर्षीय भुवन केसीको निधन भएको हो ।
ठक्करबाट गम्भीर घाईते केसीको उपचारको क्रममा राति जिल्ला अस्पताल चितवनमा निधन भएको हो । दुर्घटनामा परी सोही मोटरसाईकलमा सवार गैडाकोट ५ निवासी २६ बर्षीय शशिकपुर केसी घाईते भएका छन् ।
उनको नयाँ मेडिकल कलेज चितवनमा उपचार भई रहेको छ भने ठक्कर दिने टिप्पर र टिप्पर चालकलाई प्रहरीले नियन्त्रणमा लिएको छ ।
त्यसैगरी पूर्वी नवलपरासीको विनयी त्रिवेणी गाउँपालिका ७ वनकट्टीमा बसको ठक्करबाट शनिबार दिउँसो एक जना पैदल यात्रुको घटना स्थलमानै मृत्यु भएको छ ।
मृत्यु हुनेमा भारत बिहारको मुजफरपुर जिल्लाको बखराग्राम पन्चायत बस्ने वर्ष ४५ का धर्मा माझी रहेका छन् ।
जिल्ला प्रहरी कार्यालय नवलपुरका प्रहरी नायव उपरीक्षक एवम् सूचना अधिकारी मोहनबहादुर खाँडले दिएको जानकाीर अनुसार त्रिवेणीबाट बर्दघाटतर्फ जाँदै गरेको लु १ ख ७४८४ नम्बर को यात्रुवाहक बसले पैदल यात्रीलाई ठक्कर दिदाँ उनको घटना स्थलमानै मृत्यु भएको हो । बस र बस चालकलाई ईलाका प्रहरी कार्यालय त्रिवेणीले नियन्त्रणमा लिएको छ ।
त्यसैगरी पूर्वी नवलपरासीको विनयी त्रिवेणी गाउँपालिका ६ त्रिवेणीमा लागेको माघे औंसी मेलामा आएका एक जना जेष्ठ नागरिक भक्तजनको चिसोले मृत्यु भएको छ ।
पश्चिम नवलपरासीको पाल्हीनन्दन गाउँपालिका २ अमानीगञ्ज बस्ने ६० बर्षीय विजयी ठठेरको चिसोले निधन भएको हो । उनको त्रिवेणी बसपार्कमा मृत अवस्थामा शव भेटिएको जिल्ला प्रहरी कार्यालय नवलपुरका प्रहरी उपरीक्षक मोहनप्रसाद पोख्रेलले बताउनुभयो । मृतक ठठेरको शव पोष्टमार्टमका लागि पृथ्वीचन्द्र अस्पताल परासी पठाइएको छ ।
