नवलपुर, २ माघ । २२ औं भुकम्प सुरक्षा दिवसको अवसरमा विहीबार पूर्वी नवलपरासीको कावासोतीमा प्रभात फेरी गरिएको छ ।
जिल्ला प्रशासन कार्यालय नवलपुरको आयोजनामा विभिन्न संघसंस्थाको सहभागितामा र्याली निकालिएको थियो ।
र्याली फलफूल चोकबाट इन्द्रचोक पुगी कोण सभामा परिणत भएको थियो । र्यालीमा कावासोतीमा रहेका विभिन्न संघसंस्थाका प्रतिनिधि, पत्रकार, सुरक्षाकर्मी लगायतको सहभागिता रहेको थियो ।
फलफूल चोकमा भएको कोण सभामा हात्तीखोरमा रहेको नेपाली सेनाको टोलीले भुकम्पको बेलामा कसरी उद्दारमा जुट्ने र कसरी आफूलाई सुरक्षित राख्ने भनेर छोटो सडक नाटक प्रस्तुत गरेको थियो ।
कार्यक्रममा विभिन्न संघसंस्थाका प्रतिनिधिहरुले भुकम्पबाट बच्नका लागि सबै सजग हुनु पर्नेमा जोड दिएका थिए ।
नवलपुर जिल्लामा २०७२ सालको भुकम्पले ठूलो क्षति भएको थियो । नवलपुर जिल्ला पनि भुकम्पबाट उच्च जोखिमको जिल्लामा पर्दछ । तथापि अझै पनि नवलपुर जिल्लामा सरकारी संरचना र नयाँ बनेको भवन बाहेक अन्य भवनहरु खासै भुकम्प प्रतिरोधात्मक बन्न नसकेको राष्ट्रिय पुननिर्माण प्राधिकरण जिल्ला आयोजना कार्यान्वयन इकाई कार्यालयका इन्जिनियर ज्ञान प्रसाद उपाध्यायले बताउनु भयो ।
