माघी पर्वमा प्रदेश ५ मा दुई दिन सार्वजनिक विदा, फागुनमा दाङमा ३ दिने एक्स्पो गर्ने

बुटवल २१ पुस
माघि पर्वको अवसरमा प्रदेश ५को सरकारले २ दिन सार्वजनिक विदा दिने निर्णय गरेको छ ।
सोमवार बसेको मन्त्रिपरिषद्को बैठकले आगामी माघ १ र २ गते सार्वजनिक बिदा दिने निर्णय गरेको हो ।
मन्त्रिपरिषद्को बैठकका निर्णय सार्वजनिक गर्न सोमवार आयोजित पत्रकार सम्मेलनमा सरकारका प्रवक्ता बैजनाथ चौधरीले यही पुस २९ गते मुख्यमन्त्री निवाषमा माघी पर्व मनाउने र २ दिन सार्वजनिक बिदा दिने निर्णय गरिएकोे जानकारी गराउनु भयो ।
गतवर्ष पनि प्रदेश ५ सरकारले माघी पर्वको अवसरमा २ दिन बिदा दिएको थियो ।
मन्त्रिपरिषद्को बैठकल आउदोे फागुन १० देखि १२ गतेसम्म ३ दिन दाङमा प्रदेश स्थापना एक्स्पो गर्ने निर्णय समेत गरेको छ ।
प्रदेश सरकारले स्थापना भएदेखि हाल सम्म गरेका गतिविधि एवं सूचना, प्रविधि सहितको एक्स्पो गर्न लागिएको प्रवक्ता चौधरीले बताउनु भयो । बैठकले सूचना तथा सञ्चार प्रविधि प्रतिष्ठान संगठन संरचना एवं दरबन्दी स्वीकृत गरेको छ । बैठकले एक निर्देशकसहित १० जनाको दरबन्दी स्वीकृत गरेको हो ।
मन्त्री परिषद बैठकले रुपन्देहीका ईन्द्र प्रसाद पछाईलाई प्रदेश वन निर्देशनालयको निमित्त निर्देशकमा खटाएको छ ।
बैठकले प्रदेश पदक निमावली स्वीकृत, प्रदेश चलचित्र निर्माण, प्रदर्शन एवं वितरण अवधारणापत्र स्वीकृत गर्ने निर्णय पनि गरेको पत्रकार सम्मेलनमा प्रवक्ता चौधरीले जानकारी गराउनु भयो ।