२१ करोडको लागतमा जर्मनी प्रबिधिको कृषि चिस्यान केन्द्र बन्दै

रामकुमार श्रेष्ठ

नवलपरासी, २० पुस । पूर्वी नवलपरासीको कावासोती नगरपालिका वडा नम्वर १४ मा २१ करोडको लागतमा कृषि चिस्यान केन्द्र बन्ने भएको छ ।
‘प्रवासबाट आर्जित सिप, ज्ञान र पूँजी स्वदेशका लागि’ भन्ने मुल नाराका साथ स्थापित रिटर्नी कृषि तथा पशुपालन समूह कम्पनी लिमिटेडले तीन हजार मेट्रिक टनको चिस्यान केन्द्र बनाउन थालेको हो । चिस्यान केन्द्र निमार्णको सबै प्रक्रिया पुरा गरी माघ ४ गते शिलन्यास गर्ने कार्यक्रम रहेको रिटर्नी कृषि तथा पशुपालन समूह कम्पनी लिमिटेडका अध्यक्ष नेत्र नारायण थनेतले जानकारी दिनुभयो ।
संघीय सरकारको ५० प्रतिशत, गण्डकी प्रदेश सरकारको २० प्रतिशत सहयोग र बाँकी बिदेश गएर फर्केका देशैभरीका युवाहरुको लगानी गरी २१ करोडको लागतमा चिस्यान केन्द्र निमार्ण हुन लागेको अध्यक्ष थनेतले बताउनु भयो ।
काठमाण्डौं बाहिर पहिलो पटक ब्यवस्थित प्रबिधियुक्त चिस्यान केन्द्र निर्माण हुन लागेको हो ।
चिस्यान केन्द्रमा सिजनमा उत्पादित फलफुल तथा खाद्य बस्तुलाई भण्डारण गरी अफसिजनमा बजारमा पठाउने बताईएको छ । यसले गर्दा किसानले पनि उचित मूल्य पाउने र कृषि उपजमा परनिर्भरता समेत घट्ने उहांको दावी छ ।
१८ कठ्ठा जग्गामा ८ च्याम्बर भएको जर्मनी प्रबिधिमा आधारित केन्द्र निमार्ण हुँदैछ । जसलाई फरक फरक बस्तुहरु राख्न मिल्ने गरी निर्माण गरिने छ ।
अहिले निर्माण पूर्वको सबै तयारी पुरा गरि शिलन्यासको काम अगाडि बढाईएको जनाइएको छ । यस प्रोजेक्टसँग सहकार्य रिटर्नी माईग्रेन्ट नेपालले गरेको छ । चिस्यान केन्द्र सञ्चालन सँगै नवलपुर सहित अन्य जिल्लामा कृषि तथा फलफुलको उत्पादन बढ्ने र बजार समेत बिस्तार हुने कम्पनीले विश्वास लिएको छ ।