नवलपरासी, १९ पुस । पश्चिम नवलपरासीको बर्दघाट नगरपालिका ४ मा रहेको पारिजात सामुदायिक वन उपभोक्ता समितिको अध्यक्षमा चुडामणि भण्डारी पुन निर्वाचित हुनुभएको छ ।
शनिबार भएको सामुदायिक वनको २१ औँ बार्षिक साधारण सभा तथा अधिवेशनले भण्डारीको नेतृत्वमा नयाँ कार्यसमिति चयन गरेको हो ।
त्यसैगरी समितिको उपाध्यक्षमा आनन्द पुरी, सचिवमा कृष्णप्रसाद न्यौपाने, कोषधायक्षमा पवित्रा कुमारी रेग्मी र सह सचिवमा मञ्चु चालिसे निर्वाचित हुनुभएको छ ।
समूहका अध्यक्ष चुडामणि भण्डारीको अध्यक्षतामा भएको कार्यक्रममा बर्दघाट नगरपालिकाका नगर प्रमुख धिरज शर्मा बस्याल, बर्दघाट वडा नम्बर ४ का वडाध्यक्ष एवं नगर प्रवक्ता रविन्द्र विक्रम हमाल, समाजसेवी सरिता खनाल, बर्दघाट खानेपानीका अध्यक्ष ईन्द्र कुमार राना, समाजसेवी रुद्र प्रकाश उपाध्याय, सल्लाहकार ईन्द्र प्रसाद सापकोटा, नेपाली काँग्रेसका नगर सभापति शम्भुलाल श्रेष्ठ, समाजसेवी विश्वप्रेम पाठक, कार्यदलका नेकपा प्रतिनिधि पुण्य प्रसाद पौडेल, नेपाली कांँग्रेस प्रतिनिधि दामोदर जिसी लगाएतले शुभकामना मन्तब्य राख्नुभएको थियो ।
कार्यक्रममा अध्यक्ष भण्डारीले बार्षिक प्रगति प्रतिवेदन, लेखा समयोजक राधा देवी अधिकारीले लेखा सुपरिवेक्षण सिमितिको प्रतिबेदन प्रस्तुत गर्नुभएको थियो ।
त्यसैगरी कोषाध्यक्ष आनन्द पुरीले २४ लाख ८१ हजार ८ सय २० रुपियाँ बराबरको आर्थिक आय व्यय विवरण प्रस्तुत गर्नुभएको थियो । बर्दघाटको वडा नम्बर ४, ६, १२, १३ र सरावलको ६ र ७ कार्य क्षेत्र रहेको यस वनमा ३ हजार ८ सय ५६ घरधुरीका उपभोक्ता रहेका छन् भने ४ सय ७ दशमलव १५ हेक्टर क्षेत्रफलमा सामुदायिक वन फैलिएको छ । कार्यक्रमको सञ्चालन सचिव कृष्ण प्रसाद न्यौपानेले गर्नुभएको थियो ।
