पाल्पा, १९ पुस । पश्चिम पाल्पाको बिकट गाउँ रैनादेवी छहरा वडा नम्बर ७ को बल्ढेङगढीमा रहेको गहते निम्न माध्यामिक बिद्यालय सञ्चालनका लागि महायज्ञ आयोजना गरिने भएको छ ।
आगामी फागुन २३ गते देखि २९ गते सम्म सञ्चालन हुने महायज्ञ विद्यालय हाता भित्र मण्डप वनाएर सञ्चालन गरिने महायज्ञ मुल समारोह समितिका संयोजक तथा रैनादेवी छहरा गाउँपालिका वडा नम्बर ७ का वडाअध्यक्ष देबेन्द्र पुनले जानकारी दिनुभयो ।
पुनले स्कूल सञ्चालन गर्नका लागि शैक्षिक, भौतिक र आर्थिक पक्षलाई बलियो बनाउनका लागि महायज्ञ गर्न थालिएको जानकारी दिदै यसमा सवै पक्षको सहयोगको अपेक्षा गरिएको बताउनु भयो ।
महायज्ञ सञ्चालनका लागि महायज्ञ मुलसमारोह समिति गठन गर्नुका साथै उपसमिति समेत गठन गरिएको स्थानीय समाजसेवी टोप बहादुर थापाले जानकारी गराउनुभयो ।
समाजसेवी थापाले सरकारी तह वाट स्कूलको बिकासमा कुनै सहयोग नआएकाले स्थानीयहरुको सहकार्य र सल्लाहमा महायज्ञ आयोजना गरेर स्कूलको भौतिक पुर्वाधार निर्माण गर्नुका साथै शैक्षिक गुणस्तरको बिकास गर्ने लक्ष्य रहेको जानकारी दिनुभयो ।
ग्रामीणक्षेत्रका स्कूल र बिद्यार्थीहरुलाई सरकारले बेवास्ता गरेको बताउंदै रैनादेवी छहरा ७ काउले निवासी युवराज सापकोटाले अवका दिनमा शिक्षालाई महत्वका साथ अगाडी बढाउनुपर्नेमा स्थानीय सरोकारवालाहरुले सोच्नु पर्ने बताउनुभयो । सापकोटाले महायज्ञ बाट उठेको रकम शैक्षिक गुणस्तरमा लगाउन र यसलाई सफल पार्नका लागि सबै रैनादेवि छहरावासी र सवैलाई सहयोग पुराउन आग्रह गर्नुभयो ।
