नयाँ वर्षको स्वागतमा विभिन्न कार्यक्रम आयोजना
बुटवल, १६ पुस । अंग्रेजी नयाँ वर्ष २०२० आजदेखि सुरु भएको छ । नयाँ वर्षलाई विश्वभरका मानिसले भब्यताका साथ स्वागत गरेका छन् ।
नेपालमा पनि विभिन्न स्थानमा विशेष कार्यक्रम गरेर युवा जमातले अंग्रेजी नयाँ वर्षलाई स्वागत गरेका छन् । विशेषगरी सामाजिक सञ्जालहरु नयाँ वर्ष २०२० का शुभकामनाले भरिएका छन् । नयाँ वर्षकै अवसरमा नयाँ बर्षको अघिल्लो दिन विभिन्न स्थानमा सांगीतिक कार्यक्रमको आयोजना गरिएको थियो भने आज पनि विभिन्न कार्यक्रम गरिदै छ ।
नेपालका विभिन्न पर्यटकीय स्थल, होटल तथा रिसोर्टहरुमा राति अबेरसम्म नयाँ वर्षको स्वागतमा विभिन्न कार्यक्रम आयोजना भएका थिए ।
नयाँ वर्षको पूर्वसन्ध्यामा मंगलबारराति काठमाण्डौ, पोखरा, बुटवल, चितवनको सौराहालगायतका विभिन्न स्थानमा सांगीतिक कार्यक्रम आयोजना भएका थिए । त्यस्ता कार्यक्रममा नयाँ वर्ष मनाउने सर्वसाधारणको उत्साहजनक उपस्थिति देखिएको थियो ।
सन् २०२० को पहिलो दिन आज पनि देशका विभिन्न स्थानमा विशेष कार्यक्रमको आयोजना गरिएका छन् । ईसापुर्व २००० बर्ष पहिले इराकको मेसोपोटा मियाबाट नयाँ बर्ष मनाउने प्रचलन शुरु भएको मानिन्छ । यस्तै रोमन भाषाको जेनस शब्दबाट नयाँ बर्षको पहिलो महिना जनवरीको नामाकरण भएको मानिन्छ ।
नेपालमा पनि नयाँ बर्षको शुरुवात संगै भिजिट नेपाल २०२० शुरु भएको छ । नेपालमा धेरै भन्दा धेरै पर्यटक भित्र्याउने उद्देश्य सहित भिजिट नेपाल २०२० शुरु गरिएको हो ।
