नेता पक्राउ र धरपकडको विरुद्ध कावासोतीमा प्रदर्शन

रामकुमार श्रेष्ठ

कावासोती, १४ पुस । सिमा रक्षा र राष्ट्रिय स्वाधिनताको माग गर्दै प्रधानमन्त्रीलार्ई ज्ञापन पत्र बुझाउन जाँदा नेता सिपी गजुरेल सहितलाई पक्राउ र धरपडक गरेको विरोधमा सोमबार कावासोतीमा विरोध सभा गरिएको छ ।
देशभक्त जनगणतान्त्रिक मोर्चा नेपाल नवलपुरको आयोजनामा नवलपुरको कावासोतीमा विरोध सभा भएको हो ।
विरोध सभामा बोल्दै नेकपा क्रान्तिकारी माओवादी नवलपुरका सेक्रेटरी उत्तम थापाले सरकारले राष्ट्रिय स्वाधिनता र सिमा रक्षाको पक्षमा ज्ञापन पत्र बुझाउन जाँदा पक्राउ गर्नु खेदजनक कार्य भएको बताउनुभयो । उहांले सरकार सीमा रक्षाका लागि उदासिन भएको आरोप समेत लगाउनु भयो ।
कार्यक्रममा अखिल नेपाल क्रान्तिकारी महिला संघका केन्द्रिय सदस्य एवम् नवलपुरका अध्यक्ष गीता पाण्डेले राष्ट्रिय स्वाधिनता र सीमा रक्षाको आन्दोलन एउटा पार्टीको मात्र नभएर समग्र नेपालीको आन्दोलन भएको बताउनुभयो ।
त्यसैगरी देशभक्त जनगणतान्त्रिक मोर्चा नेपाल नवलपुरका अध्यक्ष पिताम्बर तिवारीले सरकारले गरेको धरपकडको विरोध गर्नुभयो । काशी काफ्लेको सञ्चालनमा कार्यक्रम भएको थियो ।