नेपाली काँंग्रेसको १४ औं महाधिवेशनको मिति तोकियो

केन्द्रीय समितिको कार्यकाल एक बर्ष र तरुण दलको म्याद छ महिना थप

काठमाडौं, ११ पुस । नेपाली काँंग्रेस केन्द्रीय समिति बैठकले १४ औं महाधिवेशनको मिति तोकेको छ ।
वरिष्ठ नेता रामचन्द्र पौडल समूहको बहिस्कारका बीच शुक्रबार पार्टी कार्यालय सानेपामा बसेको बैठकले १४ औं महाधिवेशन २०७७ फागुन ७, ८ ९ र १० गते काठमाण्डौमा गर्ने निर्णय गरेको हो ।
पार्टी सभापति शेरबहादुर देउवाको अध्यक्षतामा बसेको केन्द्रीय समिति बैठकले महाधिबेशनको मिति तोक्नुका साथै बहुमतका आधारमा आफ्नो कार्यकाल एक वर्ष थप्ने निर्णय गरेको छ ।
समितिको चार वर्षे कार्यकाल आगामी फागुनमा सकिने भए पनि केन्द्रीय समिति बैठकले कार्यकाल एक वर्ष थप्ने निर्णय गरेको हो । पार्टी विधानमा भएको व्यवस्थाअनुसार बैठकले केन्द्रीय समितिको कार्यकाल २०७७ फागुन १९ सम्म थप्ने निर्णय गरेको हो ।
यस्तै बैठकले नेपाल तरूण दलको म्याद छ महिना थप्ने निर्णय गरेको प्रवक्ता विश्वप्रकाश शर्माले जानकारी दिनुभयो । जितजंग बस्नेत नेतृत्वको तरूण दलको म्याद गत कात्तिकमा सकिएको थियो । प्रवक्ता शर्माका अनुसार केन्द्रीय समिति बैठकले २८ विभागलाई बढाएर ४७ पुर्याउने निर्णय पनि गरेको छ ।
बैठकमा वरिष्ठ नेता रामचन्द्र पौडेल, महामन्त्री शशाँक कोइराला, कोषाध्यक्ष सीतादेवी यादवलगायत पौडेल पक्षका केन्द्रीय सदस्य उपस्थित थिएनन् ।
बैठकले १४ औं महाधिवेशनको कार्यतालिका समेत बनाएको छ । जसअनुसार अन्तरिम संरचनाको काम यही पुस मसान्तभित्र सम्पन्न गर्न निर्वाचन समितिलाई भनेको छ भने माघदेखि बैशाखसम्म क्रियाशील सदस्यता वितरण तथा नवीकरण हुनेछ ।
महाधिवेशनको कार्यतालिकाअनुसार २०७७ असोज मसान्तसम्म नयाँ क्रियाशील सदस्यता र क्रियाशील नवीकरणको नामावलीको अन्तिम सूची तयार गरिसक्नुपर्ने अवधि तोकिएको छ । निर्वाचन सम्वन्धि सवै प्रकृया पुरा भएपछि अधिवेशनहरु सुरु हुनेछ ।
जसअनुसार २०७७ मंसिर ९ गते वडा, ११ गते गाउँ नगर, १५ गते प्रदेशसभा क्षेत्रीय, १७ गते प्रतिनिधिसभा क्षेत्रीय र २५ गते जिल्ला अबिधेशन हुने छ । यस्तै २०७७ पुस १५ गते प्रदेश अबिधेशन र फागुन ७, ८, ९ र १० गते केन्द्रीय महाधिबेशन हुने छ ।