अदालतका दुई कर्मचारी घुस सहित अख्तियारको नियन्त्रणमा

भैरहवा, ८ पुस । जिल्ला अदालत रुपन्देहीमा कार्यरत दुई जना कर्मचारीलाई घुस सहित अख्तियार दुरुपयोग अनुसन्धान आयोगको कार्यालय बुटवलले पक्राउ गरेको छ । अख्तियार कार्यालयका अनुसार अदालतका लेखापाल र नायव सुब्बालाई दुई हजार घुस सहित पक्राउ गरिएको हो ।
मुद्दाको धरौटी रकम फिर्ता गराउन सहयोग गर्ने भन्दै सेवाग्राहीसंग घुस लिदै गर्दा लेखपाल विनोद शर्मा र नायव सुब्बा बुद्धिप्रकाश न्यौपानेलाई नगदसहित पक्राउ गरिएको अख्तियार बुटवल कार्यालयका प्रवक्ता सुरेश भुसालले जानकारी दिनुभयो ।
प्रवक्ता भुसालका अनुसार सेवाग्रहीबाट कर्मचारीले घुस लिएको सूचना आयोगमा आएपछि अख्तियार कार्यालयबाट खटिएको टोलीले उनीहरुलाई आज सांझ ६ बजे रंगेहात पक्राउ गरेको हो ।
कार्यालय समय पछि शर्मा र न्यौपानेलाई अदालत नजिकै रहेको खाजाघरबाट नियन्त्रणमा लिएर थप अनुसन्धानका लागि आयोगले नियन्त्रणमा राखेको अख्तियार कार्यालय बुटवलले जनाएको छ ।