अनुमानको भरमा समाचार लेख्दा विश्वसनियता गुमेको दावी
श्यामलाल पोखरेल
बुटवल, ३० मंसिर । प्रदेश पाँचका भौतिक पूर्वाधार तथा विकास मन्त्री बैजनाथ चौधरीले पत्रकारितामा विश्वासनियता हुनुपर्ने बताउनुभएको छ । पत्रकारहरुले अनुमानको भरमा समाचार लेख्दा विश्वसनियता नहुने बताउनुभयो ।
मेचीकाली सन्देश प्रकाशन प्रालिद्वारा प्रकाशित मेचीकाली दैनिकको २० औं वार्षिकोत्सव कार्यक्रममा बोल्दै मन्त्री चौधरीले समाचार सत्य हुनुपर्ने बताउदै जवाफदेही पत्रकारिता हुनुपर्ने र सकारात्मक सोंचले समाचारहरु आउनुपर्ने बताउनुभयो ।
मिडियाकर्मीहरुमाथि आक्रोस पोख्दै मन्त्री चौधरीले अन्दाजको भरमा समाचार लेख्न नहुने बताउनुभयो । हल्ला र भ्रम फैलाउने समूहबाट टाढा रहेर सत्यतथ्य समाचार लेख्नुपर्ने उल्लेख गर्दै मन्त्री चौधरीले सरकारलाई सही दिशा निर्देशन गर्ने खालका समाचार लेख्नु पर्ने बताउनुभयो ।
उहांले हिजो,आज प्रदेशको राजधानी र नामाकरणको विषयमा आएका समाचारहरुमा सत्यता नभएको दावी गर्नुभयो । राजधानी र नामाकरणका विषयमा केही मिडियामा प्रकाशित र प्रशारित समाचारमा कुनै सत्यता नभएको मन्त्री चौधरीले टिप्पणि गर्नुभयो ।
कार्यक्रममा प्रदेशसभा सांसद भोजप्रसाद श्रेष्ठले प्रदेश पाँचको राजधानी बुटवल भन्दा बाहिर जान नसक्ने दावी गर्नुभयो । उहांले जनघनत्व र पूर्वाधार भएको ठाउंमा प्रदेशको राजधानी हुने बताउनुभयो । प्रदेशसभाको बिशेष समितिको सूचना चुहिएको भन्दै श्रेष्ठले सूचना चुहाएर भ्रम श्रृजना गर्ने काम राम्रो नभएको बताउनुभयो ।
कार्यक्रममा पत्रिकाका प्रधान सम्पादक बसन्तराज खनाल, पूर्व सांसद देवेन्द्र घिमिरे, लुम्बिनी दैनिकका अध्यक्ष मोहन चापागाई, बुद्ध सामुदायिक टेलिभिजनका कार्यकारी निर्देशक विष्णु भुसाल, पत्रिकाका पूर्व सम्पादक डिआर घिमिरे, पत्रकार महासंघ रुपन्देहीका उपाध्यक्ष दिनेश पाण्डे, रुपन्देही उद्योग संघका अध्यक्ष बाबुराम बोहोरा, लेखक तथा स्तम्भकार इन्जिनियर खेटराज दाहाल लगायतले बोल्दै पत्रिकालाई व्यवस्थित र विश्वसनिय बनाउन सुझाव दिनुभएको थियो ।
मेचीकाली सन्देश प्रकाशन प्रालिहोमराज बस्यालको अध्यक्षता र विष्णु गैरेको सञ्चालनमा कार्यक्रम भएको थियो । बुटवलबाट प्रकाशित हुंदै आएको मेचीकालीले कार्यक्रमकै अवसरमा उत्कृष्ट लेखकका रुपमा दिपक रोका, आफ्ना कर्मचारी र सम्वाददाताहरुलाई सम्मान गरेको छ ।
