बुटवल २६ मंसिर
रुपन्देहीको मायादेवी गाँउपालिकाको स्वास्थ्य शाखाले वालवालिकाको स्वास्थ्य परिक्षण गरेर मात्र खोप लगाउने परिपार्टीको शुरुवात गर्ने निर्णय गरेको छ ।
स्वास्थ्य शाखाले गाउपालिकाका ४ वटा स्वास्थ्य संस्थामा कार्यरत १५ जना स्वास्थ्यकर्मीलाई खोप लगाउनु पूर्व वालवालिकाको स्वास्थ्य परिक्षण अनिवार्य गर्ने गरि प्रशिक्षण प्रदान गरेको स्वास्थ्य शाखा प्रमुख भास्कर आत्रेयले बताउनु भयो ।
विशेष गरि नेपाल सरकारले १५ महिना मुनीका वालवालिकालाई निशुल्क रुपमा विभिन्न ११ प्रकारका रोग विरुद्धको खोप लगाउने गर्दछ ।
नेपाल सरकारले १५ महिना मुनिका वालवालिकालाई क्षयरोग, भ्यागुते, लहरेखोकी, धनुष्टकार, हेपाटाईटिस बी, होम फिलोस ईन्फून्जा टाईव बी, पोलियो, दादुरा, रुवेला, जापानिज ईन्सेप्लाईटिस र निमोनिया रोग विरुद खोप लगाउने व्यवस्था गरेको खोप अधिकृत भेषराज शर्माले बताउनु भयो । आउदो पौषको दोस्रो हप्ता देखि संचालन गरिने यो अभियानले खोपका कारण वालवालिकाको मृत्यु भएको भनी विगतमा हुन गुनासाको अन्त्य हुने संयोजक आत्रेयले बताउनु भयो । खोप लगाउनु पूर्व वालवालिकाको न्वरो, निमोनिया, पखाला, रक्तश्राव,,तौल कुपोषणका वारेमा परिक्षण गर्नुका साथै आमालाई स्वास्थ्य शिक्षाका वारेमा जानकारी गराउने समेत उहाँले बताउनु भयो । उक्त गाउँपालिकामा १७ वटा खोप क्लिनिक मार्फत करिव १ हजार १ सय वालवालिकाहरुलाई खोप सेवा प्रदान गरिने गरेको स्वास्थ्य शाखाले जनाएको छ ।
