श्यामलाल पोखरेल
बुटवल, २१ मंसिर । प्रगतिशील लेखक संघ नेपाल रुपन्देहीको आयोजनामा बुटवलमा साहित्य महोत्सव तथा पुस्तक प्रदर्शनी जारी छ । हिजो शुक्रवारदेखि शुरु भएको साहित्य महोत्सव तथा पुस्तक प्रदर्शनी आईतबार सकिदै छ । पछिल्लो समय साहित्य अनुरागी बढेपनि पठन संस्कृति कमजोर बन्दै गएको छ । पठन संस्कृतिको विकास गर्ने उद्वेश्यले बुटवलमा पहिलो पटक साहित्यिक महोत्सव तथा पुस्तक प्रदर्शनीको आयोजना गरिएको हो ।
नयाँ पुस्तालाई पुस्तक पढ्ने बानीको विकास होस् भन्ने उद्वेश्यले पुस्तक प्रदर्शनीको आयोजना गरिएको प्रगतिशील लेखक संघ रुपन्देही सचिव श्यामलाल पोखरेलले बताउनुभयो ।
पुस्तक प्रदर्शनीको दोस्रो दिन शनिबार विभिन्न विषयमा छलफल गरिएको थियो । सहरको सभ्यता रामचन्द्र श्रेष्ठ, समकालिन साहित्यबारे प्राध्यापक दिल साहानी, श्रष्टा, साधना विषयमा प्राध्यापक हुमाकान्त पाण्डेय, साहित्यको बजार प्रभाव डाक्टर मुरारी पराजुली र बुटवलको इतिहांसबारे विमलबहादुर शाक्यले चर्चा गर्नुभएको थियो ।
पुस्तक प्रदर्शनीको दोस्रो दिन शनिबार २ हजार बढीले अवलोकन गरेको र ८० हजारको पुस्तकहरु बिक्री भएको अध्यक्ष दलबहादुर गुरुङले जानकारी गराउनुभयो ।
