काठमाडौं, १५ मंसिर । १३ औं दक्षिण एसियाली खेलकुद प्रतियोगिता (साग) को आइतबार साँझ काठमाडौं स्थित दशरथ रंगशालामा उद्घाटन भएको छ ।
प्रतियोगिताको साँझ ५ बजे राष्ट्रपति विद्यादेवी भण्डारीले भव्य समारोहका बीच औपचारिक उद्घाटन गर्नुभएको हो । दक्षिण एसियाली खेलकुद सागको उद्घाटन गर्दै राष्ट्रपति भण्डारीले भन्नुभयो –“म साग खेलकुद सुरु भएको घोषणा गर्दछु ।”
समारोहमा कलाकारहरुले नेपालका साथै सदस्य मुलुकको मौलिक संस्कृति झल्कने विविध सांस्कृतिक कार्यक्रम प्रस्तुत गरेका थिए । सो अवसरमा लाखे नृत्य र सागको मस्कट पनि प्रस्तुत गरिएको थियो ।
उद्घाटन समारोहमा मुलुकका सातै प्रदेश पुर्याएर ल्याइएको सागको ज्योति प्रवेश गराइएको थियो । समारोहमा पटका पड्काएर आतासवाजी गरिएको थियो ।
