बुटवल, १४ मंसिर । शनिवार भएको उपनिर्वाचनको मत परिणाम आउने क्रम शुरु भएको छ । मत परिणाम अनुसार नेपाली कांग्रेसले बैतडीबाट जितको खाता खोलेको छ । बैतडीको सुर्नया गाउँपालिका वडा नम्बर १ को अध्यक्षमा कांग्रेसका गजेन्द्रबहदुर चन्द विजयी हुनु भएको छ ।
उहां नेकपाका धनबहादुर चन्दलाई ४ मतले पराजित गरी वडाध्यक्षमा विजयी हुनुभएको हो । विजयी गजेन्द्रले २१९ मत ल्याउनु भएको छ भने निकटतम प्रतिद्वन्दी नेकपाका धनबहादुरले २१५ मत ल्याउनु भएको छ ।
यस्तै सर्लाहीको हरिपूर्वा नगरपालिका १ मा वडाध्यक्षका लागि भएको उपनिर्वाचनमा समाजवादी पार्टीका श्यामबाबु राय विजयी हुनुभएको छ । उहां ३४७ मत ल्याएर विजयी हुनुभएको हो भने उहांका निकटतम प्रतिद्वन्दी राष्ट्रिय जनता पार्टी नेपाल (राजपा) का उम्मेदवार रामविश्वास राय र नेपाल कम्युनिस्ट पार्टीका उम्मेदवार दोस मोहम्मद अंसारीले समान ३ सय २८ मत प्राप्त गर्नुभएको छ ।
यसैगरी रोल्पा जिल्लाको थवाङ गाउँपालिकाको वडा नम्बर १ को वडाध्यक्ष पदका लागि भएको उपनिर्वाचनमा नेकपाका जनकबहादुर बुढामगर विजयी हुनुभएको छ ।
तत्कालीन वडाध्यक्ष फर्कबहादुर बुढामगरको गएको असार ६ गते निधन भएपछि भएको उपनिर्वाचनमा नेकपाका बुढामगर १७४ मत प्राप्त गरी वडाध्यक्षमा विजयी हुनु भएको हो । कुल मतदाता १२८४ रहेको सो वडामा २०९ मत मात्र खसेको निर्वाचन आयोगले जनाएको छ । बूढामगरका निकट्तम प्रतिद्वन्द्वी नेपाली कांग्रेसका कमलबहादुर रोकामगरले २६ मत मात्र प्राप्त गर्नुभएको छ ।
