माछाको संख्या बढाउन तिनाउ नदिमा छोडियो एक लाख भुरा

बुटवल, ५ मंसिर । पर्यावरणमा परेको असरले खोलाका माछा हरेक वर्ष घट्दै गएपछि रुपन्देहीका किसानले तिनाउ नदिमा माछाका भुरा राखेका छन् । विश्व मत्स्य दिवसको अवसर पारेर रहु र नैनी जातका एक लाख भुरा माछा नदिमा छोडिएको हो । पछिल्लो समय चुरे क्षेत्रमा भएको अत्याधिक दोहन, तराईका खोलामा हुने उत्खनन् तथा बजार र कलकारखानाबाट नदिमा बगाईने फोहोरले खोलाको पानी दुषित बनेको छ । खोलामा प्रदुषण बढेपछि त्यसको असर माछामा देखिएको प्रधानमन्त्री कृषि आधुनिकिकरण कार्यक्रम परियोजना इकाई मत्स्य सुपर जोनका अधिकृत रमेश जैसवालले बताउनुभयो ।
विश्व मत्स्य दिवसको अवसरमा मत्स्य सुपर जोन, मत्स्य व्यवसायी संघ रुपन्देही लगायतका संघ सस्थाहरुले बिहिबार पश्चिम अमुवामा ¥याली समेत निकालेका थिए । स्थानीय जनप्रतिनिधि, माछा किसान, व्यवसायी, कर्मचारी, विद्यार्थी र पत्रकार सहितको ¥याली बजार परिक्रमा गरी तिनाउ नदिमा गएर माछाका भुरा छोडिएको जिल्ला मत्स्य व्यवसायी संघ रुपन्देहीका अध्यक्ष दिपु भुषालले जानकारी दिनुभयो ।
विसं २०७० सालसम्म रुपन्देहीका दक्षिण भेगका बाजिया, कलवार र ठहरे लगायतका जातिका मानिस तिनाउ नदिमा माछा मारेर जीविका चलाउँदै आएका थिए । तर अहिले खोलामा माछा कम छन् ।
अहिले छोडिएका भुरा माछा एक वर्ष पछि ठूला हुने र माछा मारेर जीविका चलाउनेहरुका लागि पनि सजिलो होस् भनेर नदिमा भुरा माछा छोडिएको मत्स्य व्यवसायी संघ रुपन्देहीका अध्यक्ष भुषालले बताउनुभयो । नदिमा माछा बाच्नसक्ने गरि नदिलाई सफा राख्न सबै स्थानियसँग रुपन्देहीका किसानले आग्रह गरेका छन् । यसरी खोलामा छाडिने भुरा दुषित पानीमा बाच्न कठिने हुने भएकाले यस्तो आग्रह गरिएको हो ।