बुटवल, ४ मंसिर । रुपन्देहीमा सम्पन्न न्यू होराईजन अन्तर मावि जिल्ला स्तरिय क्रिकेट प्रतियोगिताको दशौं संस्करणको उपाधि आयोजक होराईजन जिविएसले जितेको छ ।
बुधबार भएको फाइनल खेलमा न्यू होराईजन माबिलाई ७ रनले पराजित गर्दै होराईजन जिविएसले उपाधि चुमेको हो । उपाधिसंगै होराईजन जिविएसले नगद २० हजार, कप, मेडल र प्रमाणपत्रबाट पुरस्कृत भएको छ । उपविजेता न्यु होराईजन नगद १० हजार, कप, मेडल र प्रमाणपत्रबाट पुरस्कृत भएको छ ।
प्रतियोगितामा न्यू होराईजनका प्रकाश गिरी म्यान अफ द सिरिजबाट पुरस्कृत भए । यसैगरि न्यू होराईजनकै अमर मिश्रा उत्कृष्ट ब्याट्सम्यान तथा होराईजन जिविएसका सुरज खड्का उत्कृष्ट बलरबाट पुरस्कृत भए ।
न्यु होराईजन एजुकेशन ईन्ष्टिच्युटको आयोजनामा तिलोत्तमा नगरपालिकाको नवजिवन खेलमैदानमा भएको खेलमा टस जितेर होराईजन जिविएसले पुरै ओभरमा ७ विकेटको नोक्सानीमा ९० रन बनाएको थियो । जिविएसका लागि निश्चल पराजुलीले नटआउट २४ तथा विजय श्रेष्ठले ८ रन रन जोडे ।
कम स्कोरलाई पछ्याएको न्यू होराईजनका ब्याट्सम्यान १९.३ ओभरमा केवल ८३ रनमा समेटिएका थिए । न्यू होराईजनका मदन खरेलले २१ तथा प्रकाश गिरीले १२ रन बनाए । होराईजन जिविएसको जितमा विजय श्रेष्ठले ४ विकेट लिए । उनी खेलमा म्यान अफ दी म्याचबाट पुरस्कृत भए ।
प्रतियोगिताका विजेता, उपविजेता तथा उत्कृष्ट खेलाडीहरुलाई तिलोत्तमा नगरपालिकाका नगर प्रमुख बासुदेव घिमिरे, क्रिकेट एसोसियसन अफ नेपालका केन्द्रिय सदस्य प्रशान्तविक्रम मल्ल, अन्तर्राष्ट्रिय अम्पायर सन्जय गुरुङ, विद्यालयका प्राचार्य लोकनाथ उपाध्याय, खेलका संयोजक शक्ति गौचन लगायतले पुरस्कार प्रदान गर्नुभएको थियो ।
