बुटवल, ११ असोज । रुपन्देहीको तिलोत्तमा नगरपालिका–२ जानकीनगर स्थित सदुपयोग बचत तथा ऋण सहकारी संस्था लिमिटेडको आठौं बार्षिक साधारण सभा शनिवार सम्पन्न भएको छ ।
साधारण सभामा बार्षिक प्रतिबेदन प्रस्तुत गर्दै सहकारीका अध्यक्ष कर्णबहादुर टण्डनले सदस्यता बृद्धिलाई प्राथमिक्तामा राख्दै एक जना सदस्यले एक जना सदस्य थप गर्न ‘म संग मेरो साथी अभियान संचालन गरिने बताउनु भयो ।
अध्यक्ष टण्डनले एसईई परीक्षामा उत्कृष्ट अँक ल्याउने शेयर सदस्यका छोरा छारी, असल ऋणी र भूतपुर्व अध्यक्ष सम्मान कार्यक्रमलाई निरन्तरता दिईएको, बिना धितो ९० प्रतिसत र शेयर सदस्यको माग अनुरुप धितो मुल्यांकन गरी १० लाख सम्म कर्जा लगानी गरिएको जानकारी गराउनु भयो । ५१९ जना शेयर सदस्य रहेको सहकारीले २ करोड ३० लाख बराबरको कारोवार गर्दै आएको छ भने यस आर्थिक बर्षमा ६०० सदस्य पुर्याउने लक्ष राखेको छ ।
सहकारीका उपाध्यक्ष गोपाल कार्कीको स्वागत र सचिव कमल अर्यालको संचालनमा भएको कार्यक्रममा मणिमुकुन्द कलेज ब्यवस्थापन समितिका अध्यक्ष दयाराम बश्यालले सहकारीका सबै सदस्यहरुले सहकारीका अवधारणा र उद्देश्य अनुरुप सहकारीको मूल्य मान्यता, आदर्श र सिद्धान्तहरुलाई आत्मसाथ गर्नुपर्ने बताउनु भयो । सदस्यहरुलाई संस्था प्रति जागरुक र सचेत गराउन सहकारी शिक्षा तालिम संचालन गर्न सहकारी संस्थालाई सुझाव दिनुभयो ।
पत्रकार खिमानन्द भट्राईले मुलुकको आर्थिक संमृद्धि संगै शेयर सदस्यहरुमा बचत गर्ने बानीको विकास र उनीहरुको आवश्यक्ता परिपुर्तीमा सहकारी संस्थाहरुले महत्वपुर्ण भूमिका निर्वाह गरेको बताउनु भयो । उहांले सबै मिलेर केही पैसा जम्मा गर्ने, मिलिजुली आफ्नो आर्थिक, सामाजिक र सांस्कृतिक हैसियत माथि उठाउन काम गर्ने उदेश्यले सहकारी संस्थाहरु स्थापना भएका हुनाले यसको संथागत विकासमा पनि सामुहिक पहल प्रयास आवश्यक हुने बताउनु भयो ।
सहकारीका कोषाध्यक्ष प्रकाश चापागाईले आर्थिक प्रतिवेदन र लेखा समिति संयोजक मुकुन्दराज कँडेलले लेखा प्रतिवेदन प्रस्तुत गर्नुभएको कार्यक्रममा संस्थापक अध्यक्ष ईश्वर शर्मा, संचालक सदस्य रमाकान्त अर्याल, शिक्षा उप समिति सदस्य समिता आचार्य भट्टराईलगायतले मन्तब्य ब्यक्त गर्नुभएको थियो ।
कार्यक्रममा संस्थामा महत्वपुर्ण योगदान पुर्याउनु भएका ऋण उप समिति संयोजक ढकबहादुर टण्डन, असल ऋणी लक्ष्मी कुवंर र एस ई ई परीक्षामा उत्कृष्ट अंक ल्याउने दुई जना शेयर सदस्यका छोरीहरु कृपा पन्त र रन्जिता शाहीलाई सम्मान गरिएको थियो । संस्थाले सामाजिक उत्तरदायित्व अन्तर्गत रक्तदान लगायतका कार्यक्रम समेत आयोजना गर्दै आएको सचिव कमल अर्यालले वताउनु भयो ।
