बुटवल, ४ असोज । राष्ट्रिय महिला मोर्चा बुटवल उपमहानगर समितिले शनिबार बुटवलमा आयोजना गरेको संविधान पूर्नलेखन तथा भ्रष्टाचार न्युनिकरण विषयक छलफल तथा जनजागरण कार्यक्रममा सहभागिहरुले महिलाहरुको पूर्ण अधिकार प्राप्तिका लागि संविधानमा रहेका त्रुटिहरुलाई सच्याउन माग गरेका छन् ।
राष्ट्रिय महिला मोर्चा बुटवल उपमहानगर समितिका अध्यक्ष बसन्ती साठिघरेको अध्यक्षतामा भएको कार्यक्रममा बोल्दै राष्ट्रिय जनमुक्ति पार्टीका केन्द्रिय महासचिव केशब सुर्यबंशीले संविधानमा बाझिने अमिल्दो वाक्य र धेरै त्रुटि रहेकाले संशोधनले नहुने भन्दै पूनर्लेखन गर्नुपर्ने बताउनुभयो । उत्पिडनमा परेका वर्ग, समुदाय, क्षेत्र, भाषिक, धार्मिक लगायतका पक्षलाई सहि व्याख्या र विश्लेषण सहित २०६३ को अन्तरिम संविधानलाई टपक्क टिपेर वर्तमान संविधानको पूनर्लेखन गर्नुपर्नेमा उहांले जोड दिनुभयो । संविधानको दिर्घायु र सबैको अपनत्वका लागि राजनैतिक सहमतिमा संविधानको पूनर्लेखन गर्न सकिने उनको भनाई छ ।
सो अवसरमा राष्ट्रिय महिला मोर्चाका केन्द्रिय बरिष्ठ उपाध्यक्ष मधु राना, महासचिव धनी आले, पार्टीका बुटवल उपमहानगर अध्यक्ष थर्क बहादुर बारघरे, मोर्चाका बुटवल उपमहानगर उपाध्यक्ष नारायणी पाटा, सचिव माया सारु लगायतले आआफ्ना धारणा राख्नुभएको थियो ।
