यात्रु सहायता कक्ष सञ्चालन तथा अनुगमनलाई प्रभावकारी बनाइने
बुटवल ३ असोज । चाडपर्वको समयमा यात्रुको चांप बढ्ने भएकाले अग्रिम टिकट बुकिङ् गर्न तथा यातायात सेवालाई सहज बनाउने यातायात व्यबसायीहरुले प्रतिवद्धता व्यक्त गरेका छन् ।
सार्वजनिक यातायातको प्रभावकारी सेवा सञ्चालनकालागि बिभिन्न स्थानमा यातायात व्यबस्था कार्यालय, सेवा कार्यालयहरु र सरोकारवालाको समेत प्रतिनिधित्व हुनेगरी यात्रु सहायता कक्ष सञ्चालन तथा अनुगमनलाई समेत प्रभावकारी बनाइने छ ।
प्रदेश पाँच भौतिक पूर्वाधार बिकास मन्त्री बैजनाथ चौधरीको अध्यक्षतामा बसेको प्रमुख जिल्ला अधिकारी, सम्बन्धित कार्यालयका कार्यालय प्रमुखहरु तथा यातायात व्यवसायी समेतको बैठकले दशैं लगायतका चाडपर्वमा यात्रुको सुरक्षित यात्रा व्यबस्थापनका लागि प्रदेश भित्रका सडकहरुको मर्मतसंभार तथा सुधारको कामलाई निरन्तरता दिने र सवारी मैत्री वातावरण कायम राखेर यातायात सेवालाई प्रभावकारी बनाउने निर्णय गरेको छ । यसकालागि सबै निकायले आफ्नो तर्फबाट पहल गर्ने समेत बैठकबाट निर्णय गरिएको छ ।
त्यस्तै भारतसंग जोडिएका नाकाहरुबाट चाडपर्व मनाउन नेपाल आउने यात्रुहरुलाई सुरक्षित र सहज यात्राको वातावरण तयार गर्न अन्तरसिमा समन्वयकालागि सम्वन्धित जिल्लाका प्रमुख जिल्ला अधिकारीहरुले व्यबस्थापन गर्ने छन् भने दशैंको दिन समेत यातायात सञ्चालन गर्नकालागि व्यबस्था मिलाउने व्यबसायीहरुले प्रतिवद्धता जनाएका छन् ।
सोही बैठकले आन्तरिक मामिला तथा कानुन मन्त्रालयका सचिवको संयोजकत्वमा भौतिक पूर्वाधार बिकास मन्त्रालयका सचिव, मुख्यमन्त्री तथा मन्त्रिपरिषदको कार्यालयका सचिव, प्रदेश प्रहरी कार्यालय दाङका प्रमुख, प्रदेश शसस्त्र प्रहरी कार्यालय चन्द्रौटाका प्रमुख, प्रदेश ट्राफिक प्रहरी कार्यालय बुटवलका प्रमुख, उपभोक्ता हित संरक्षण मन्चका अध्यक्ष, सुरक्षित यात्रा अभियान नेपालका अध्यक्ष सदस्य तथा प्रादेशिक सडक तथा यातायात व्यबस्था महाशाखाका प्रमुख सदस्य सचिव रहेको प्रदेश स्तरीय सार्वजनिक यातायात व्यबस्था अनुगमन समिति समेत गठन गरेको छ ।
