रुपन्देहीमा ७० जनामा डेंगुको संक्रमण
बुटवल, २१ भदौ । केही दिन यता यस क्षेत्रमा डेंगुको संक्रमण फैलिएको समाचार सार्वजनिक भएपछि प्रदेश ५ का आन्तरिक मामिला तथा कानुन मन्त्री कुलप्रसाद केसीले बुटवल स्थित ५ नम्वर प्रदेश स्तरिय प्रादेशिक अस्पतालमा पुगेर डेंगुका विरामीको अवस्था वुझ्नु भएको छ ।
मन्त्री केसी शनिवार लुम्विनी प्रादेशिक अस्पतालमा गै विरामीको अवस्थाका वारेमा जानकारी लिनु भएको हो । जिल्लामा गत मंगलबार सम्म ४२ जनामा डेंगुको संक्रमण देखिएकोमा शुक्रवारसम्म ७० जना पुगेका छन् ।
जिल्ला जनस्वास्थ्य कार्यालयले जिल्लामा ७० जनामा डेंगुको संक्रमण देखिएको पुष्टि गरेको छ । दिनप्रतिदिन डेंगुका विरामी थपिदै जांदा अस्पतालमा बेडको अभाव देखिएको छ ।
अस्पताल पुग्नु भएका मन्त्री केसीले अस्पतालमा रहेका बिरामीका आफन्तहरु संग उपचारको अवस्था र अस्पतालको सेवाबारे जानकारी लिनु भएको थियो । अस्पालमा रहेका बिरामीका आफन्तले मन्त्री संग बिरामी राख्ने बेडको अभाव रहेकोले एउटै बेडमा ४ जना सम्म बिरामी राखेर उपचार गराउन परेको गुनासो गरेका थिए ।
लुम्विनी प्रादेशिक अस्पतालका मेडिकल सुपेरिटेण्डेन्ट डाक्टर कृष्ण खनालले बिरामी राख्ने स्थानको अभावमा उपचार प्रभावकारी हुन नसकेको मन्त्री केसीलाई जानकारी गराउनु भएको थियो ।
मन्त्री केसीले बाहिरको अवस्था र बढ्दो बिरामीको चांपलाई हेर्दा माहमारीको खतरा हुन सक्ने भएकोले पुर्व तयारी अपनाउन र सोही अनुसारको ब्यवस्थापन गर्न अस्पताल प्रशासनलाई निर्देशन दिनुभएको छ ।
रुपन्देहीका लुम्बिनी प्रादेशिक अस्पताल, भीम अस्पताल, युनिभर्सल मेडिकल कलेज भैरहवा, क्रिमसन अस्पताल मणिग्राम, गौतमबुद्ध सामुदायिक मुटु अस्पताल बुटवलमा डेंगु रोगको परीक्षण हुने गरेको छ । संघियता अघिका वर्षहरुमा जिल्ला जनस्वास्थ्य कार्यालयले डेंगु नियन्त्रणको अभियान संचालन गर्ने गरेपनि उक्त अधिकार स्थानीय तहले पाएसंगै नियन्त्रणको पहल शुरु नहुदा डेंगुको संक्रमण दिनप्रतिदिन वृद्धि हुदै गएको छ ।
