रुपन्देहीको तिलोत्तमा स्थित सामुहिक सहकारीमा एटिएम सेवा शुरु

बुटवल, २१ भाद्र
बचत तथा ऋणको मात्र कारोबार गर्न अनुमती पाएका रुपन्देहीका सहकारीले बैंकले प्रदान गर्दै आएको एटीएम सेवा पनि दिन थालेका छन् ।
वित्तीयसँगै प्रविधिको विकासमा फड्को मारिरहेका सहकारीले रुपन्देहीमा एटीएम सेवाको नयाँ अभ्यास शुरू गरेका छन् ।
पाँच नम्बर प्रदेशको राजधानी रूपन्देहीको तिलोत्तमास्थित सामूहिक बचत तथा ऋण सहकारी संस्था लिमिटेडले सेवाग्राही र बचतकर्ताको सुविधालाई सहज वनाउन भन्दै एटीएम सेवा शुरू गरेको जनाएको छ ।
सामूहिक विकास सहकारी ५ नम्बर प्रदेशकै पहिलो एटीएम सञ्चालन गर्ने सहकारीका रुपमा परिचित हुन सफल भएको छ ।उक्त सहकारीमा ७ हजार ५५ जना सदस्य छन् । सहकारीको कूल पूँजी २ अर्ब १२ करोड, तथा बचत १ अर्ब ५७ करोड र १ अर्ब ७२ करोड रूपैयाँ ऋण लगानी गरेको जनाएको छ ।
एटीएमसँगै सहकारीकले एप समेत बनाएको छ । एप मार्फत खानेपानी, बिजुली, हवाइजहाज टिकट पनि सहकारीबाट तिर्न र लिन सकिने सहकारीका प्रमुख व्यवस्थापक ईश्वरी मरासनीले बताउनु भयो ।
त्यसैगरी सदस्यका हिसावले प्रदेशमै पहिलोरुपन्देहीकै कोटीहवामा संचालित जनउत्थान बचत तथा क्रृण सहकारी संस्थाले पनि एटिएम सेवा सञ्चालन गर्ने तयारी गरेको छ । त्यस्तै रुपन्देहीको देवदहस्थित कोलीय देवदह सहकारी पनि एटीएम सञ्चालनको तयारीमा छ ।
बढ्दो प्रविधिको माग र आवश्यकतालाई बुझेर सहकारीहरु पनि प्रविधिमैत्री बन्दै गएको सहकारी विज्ञ डा. खगराज शर्माले बताउनु भयो ।
एटिएम संगै पछिल्लो समय सहकारी संस्थाहरू बीच वेबसाइट निर्माण गर्ने, मोबाइल, इ–बैंकिङ लगायत प्रविधिमा आधारित अत्याधुनिक सेवा प्रदान गर्ने क्रम समेत चलेको छ । रुपन्देहीमा ७ सय ६० भन्दा बढी सहकारी संस्था संचालनमा रहेका छन् ।