बुटवल, १७ वैशाख । भारतीय अभिनेता इरफान खानको निधन भएको छ । भारतीय पत्रिका हिन्दूस्तान टाईम्सका अनुसार बलिउड अभिनेता खानको ५४ वर्षको उमेरमा मुम्बईको कोकिलाबेन धिरुभाई अम्बानी अस्पतालमा बुधवार विहान निधन भएको हो ।
स्वास्थ्यमा समस्या देखिएपछि खानलाई मंगलवार अस्पतालको आईसीयूमा भर्ना गरिएको थियो । अभिनेता खानलाई ‘कोलन इन्फेक्सन’ भएको खानका प्रवक्ताले बताएका थिए ।
गत वर्ष स्वास्थ्यमा समस्या देखिएपछि लन्डनमा उपचार गराएर खान भारत फर्केका थिए । भारत फर्केपछि इरफान मुम्बईको कोकिलाबेन अस्पतालकै डाक्टरको निगरानीमा नियमित रुपमा स्वास्थ्य जाँच गराइरहेका थिए । गत वर्ष खानले एउटै मात्र फिल्म ‘अंग्रेजी मिडियम’ मा काम गरेका थिए । सो फिल्मको छायांकनका बेला पनि उनको स्वास्थ्यमा समस्या आएको बताइएको थियो ।
गत शनिबार बिहान मात्र उनकी आमा सइदा बेगमको ९५ वर्षको उमेरमा निधन भएको थियो । कोरोना भाइरस संक्रमण रोकथाम तथा नियन्त्रणका लागि लगाइएको लकडाउनका कारण खान आमाको अन्तिम संस्कारमा समेत जान पाएका थिएनन् । भिडियो कलमार्फत खानले आमाप्रति श्रद्धान्जली प्रकट गरेका थिए ।
वलिउड अभिनेता खान न्यूरोएन्डोक्राइन ट्युमरबाट ग्रसित थिए । सन् २०१८ को मार्चमा उनमा यो रोग देखिएको आफैले ट्वीटमार्फत बताएका थिए । कुशल अभिनयका लागि चिनिएका इरफानले सलाम बम्बे, मकबुल, पान सिंह तोमर, द लन्चबक्स, हैदर, गुन्डे, पिकु, तलभार लगायत फिल्ममा अभिनय गरेका छन् ।
