भैरहवा, १४ भाद्र
सिद्धार्थनगर नगरपालिका र प्रसित प्रतिष्ठान नेपालको संयुक्त आयोजनामा शनिबार रुपन्देही क्याम्पसमा सम्पन्न मावि स्तरीय तीज गीत प्रतियोगितामा काशीका प्रतियोगीहरु प्रथम भएका हुन् । उनीहरुले नगद १० हजार र प्रमाणपत्र प्राप्त गरे । यस्तै, प्रतियोगितामा साई ग्लोबल माविका विद्यार्थी द्वितिय भए । उनीहरुले नगद ७ हजार र प्रमाणपत्र प्राप्त गरे । मुनलाइट आवसीय माविका विद्यार्थी तृतिय भए भने रुपन्देही लिलाराम न्यौपाने माविका विद्यार्थी सान्त्वना भए । उनीहरुले क्रमशः नगद ५ हजार र ३ हजार रुपैयाँसहित प्रमाणपत्र प्राप्त गरेका छन ।
नगरभित्रका १३ विद्यालय सहभागी प्रतियोगितामा ‘स्वस्थ, सुखी र समृद्ध जीवन’ शीर्षकमा रहेर सहभागीले तीज गीत गाएका थिए । शिक्षाविद् बालकृष्ण भट्टराई, बुटवल बहुमुखी क्याम्पसका प्राध्यापक हिरणन्यलाल ज्ञवाली र डा.लक्ष्मी पोखरेलले निर्णायकको भूमिका खेलेका थिए । निर्णायकले दिएको नम्बरका आधार विजयी छनौट गरिएको हो । विजयी विद्यार्थीहरुलाई पुरस्कार प्रदान गर्दै संविधान सभा सदस्य एवं लोक गायिका सिन्धु जलेसाले तीजको संस्कृति जोगाउन नगरपालिकाले आयोजना गरेको प्रतियोगिताले सहयोग पुग्ने बताइन् । स्थानीयस्तरमा हुने यस्ता कार्यक्रमले नयाँ पुस्तामा संस्कृतिप्रतिको माया बढ्ने र कलाकारिता क्षेत्र पनि विस्तार हुँदै जाने बताइन् । उनले पछिल्लो समय तीजका गीतहरुले संस्कृतिको जगेर्ना गर्ने भन्दा बढी भड्कीला हुन थालेको भन्दै यसलाई राक्नु पर्ने धारणा राखिन् ।
कार्यक्रममा सिद्धार्थनगर नगरपालिका प्रमुख हरिप्रसाद अधिकारी, उपप्रमुख उमा काफ्ले, कार्यक्रम संयोजक एवं प्रसित प्रतिष्ठान नेपालका अध्यक्ष प्रा.डा. कपिलदेव लामिछाने, सिद्धार्थ साहित्य परिषद् अध्यक्ष डिल्लीराज भट्टराई, निर्णायक बालकृष्ण भट्टराई र ज्ञवाली लगायतले बोल्दै होटल तथा पार्टी प्यालेसमा गरिने भड्किला तीज गीतले संस्कृति जगेर्ना गर्नेभन्दा विकृति फैलाउने बताए । उनीहरुले अबको आउँदो पुस्तामा संस्कृतिसहितको तीजलाई हस्तान्तरण गर्न यस्ता किसिमका प्रतियोगिता सहयोगी हुने धारणा राखे । कार्यक्रममा नगरपालिकाका विभिन्न वडाका वडाअध्यक्षहरु, कर्मचारी, साहित्यकार विजयगोविन्द श्रेष्ठ, भैरहवा मर्निङवाक गु्रपका अध्यक्ष ओमकार गौचन लगायतको आतिथ्यता थियो । कार्यक्रम भैरहवा बहुमुखी क्याम्पसका प्राध्यापक कृष्णप्रसाद बश्यालको संचालनमा भएको थियो ।
