लोक सेवा आयोगको परीक्षाको विज्ञापन सच्याउन माग

बुटवल, ९ भदौ । नेपाल आदिवासी जनजाति महासंघ (नेफिन)का उपाध्यक्ष नविन रोका मगरले कर्मचारी भर्नाका लागि लोक सेवा आयोगले जारी गरेको परीक्षाको विज्ञापन सच्याउन माग गर्नुभएको छ । उहांले लोक सेवा आयोगको बिज्ञापन प्रकाशननै असंबैधानिक भएको दावी गर्नुभयो ।
सोमबार बुटवलमा आयोजित पत्रकार भेटघाट कार्यक्रममा उपाध्यक्ष मगरले संविधानमा उल्लेख भएअनुसार समावेसी विज्ञापन प्रकाशन हुनुपर्नेमा जोड दिदै लोक सेवा आयोग तथा राजनीतिक दलहरुलाई संविधानप्रति इमान्दार हुन आग्रह गर्नुभयो । उहांले लोकसेवा आयोगले जारी गरेको विज्ञापन नसच्चिएसम्म आन्दोलन जारी रहने समेत बताउनु भयो ।
राज्य व्यवस्था समितिले विज्ञापन प्रकाशनको निर्णय सच्याउनका लागि पत्रचार तथा निर्देशन गरिसकेको अवस्थामा समेत सरकार तथा लोक सोवा आयोगले बेवास्ता गरेको भन्दै आपत्ति जनाउनु भयो ।
आरक्षण बचाउ अभियानको आन्दोलन जारी रहेको बताउदै उहांले यो बिषय संविधान र नेपाली जनतासँग जोडिएको विषय भएकाले संसदमा मुख्य विषयको रुपमा छलफल हुनुपर्ने माग गर्नुभयो ।
पछिल्लो समय राजाबादी शक्तिहरु सलबलाई रहेको कुरा उल्लेख गर्दै उहांले दलहरु संविधानको बर्खिलापमा गए हिजोकै अवस्था आउन सक्नेतर्फ सचेत हुन दलहरुलाई आग्रह गर्नुभयो ।
पत्रकार भेटघाट कार्यक्रम कार्यक्रम आदिवासी जनजाति महासंघ प्रदेश ५ संयोजक दिपक गुरुङको अध्यक्षता तथा सचिव मनोज रानाको सञ्चालनमा भएको थियो ।