नवलपरासीको बिजयी शुरुवात : दाङ ३–० गोलअन्तरले पराजित
दाङ, ५ भदौ । प्रदेश नम्बर ५ मुख्यमन्त्री कप प्रदेश लिग फुटबल प्रतियोगिता बिहिबारदेखि दाङमा शुरु भएको छ ।
प्रतियोगिताको उदघाटन खेलमा आयोजक जिल्ला दाङलाई पराजित गरी नवलपरासीले बिजयी शुरुवात गरेको छ ।
नवलपरासीले दाङलाई ३–० गोलअन्तरले पराजित गर्दै विजयी सुरुवात गरेको हो । उदघाटन खेलमा दाङका विरुद्ध ३ गोल गरेर नवलपरासीका सुरज आले मगरले ह्याट्रिक गरेका छन् । मगरले खेलको पहिलो हाफको ६ मिनेटमा कर्नरबाट आएको बललाई हेडमार्फत गोल गरेका थिए । त्यस्तै खेलको ३०औं मिनेट दोश्रो गोल र दोश्रो हाफको ८८औं मिनेटमा अर्को गरेका थिए ।
प्रतियोगिता अन्तर्गत शुक्रबार २ वटा खेल हुने छन् । शुक्रवारको पहिलो खेल बिहान रोल्पा र बर्दियाबिच हुने छ भने अपरान्ह बाँके र रुपन्देहीबिच खेल हुने आयोजकले जनाएको छ ।
भदौ १२ गतेसम्म संचालन हुने लिग प्रतियोगितामा प्रदेश ५ का विभिन्न ६ जिल्लाका खेलाडीहरुको सहभागिता रहेको छ । प्रतियोगितामा प्रथम हुने टीमले २ लाखसहित कप र उपविजेताले १ लाख पुरस्कार पाउने छ ।
दाङको तुलसीपुर उपमहानगरपालिका वडा नं. १७ बेलझुण्डी रंगशालामा सुरु भएको प्रतियोगिताको प्रदेश नम्बर ५ का सामाजिक विकास मन्त्री सुदर्शन बरालले उदघाटन गर्नुभयो । सो अवसरमा बोल्दै मन्त्री बरालले खेलकुदको समग्र विकासका लागि प्रदेश सरकार लागि परेको बताउनुभयो । मन्त्री बरालले खेलकुदको पूर्वाधार र खेल क्षेत्रको विकासमा कुनै कसर बाँकी नराख्ने उल्लेख गर्नुभयो ।
खेल स्वास्थ्यका लागि मात्रै नभई राष्ट्रको गरिमा उँचो बनाउने बलियो आधार भएको हुँदा आगामी पुस्ताले खेल क्षेत्रबाट सिक्ने गरी खेलाडी उत्पादन गर्ने काममा सरकार गम्भिरताका साथ लागि परेको मन्त्री बरालले बताउनुभयो ।
अखिल नेपाल फुटबल संघका अध्यक्ष कर्मा छिरिङ शेर्पाले काठमान्डौं केन्द्रित रहँदै आएको लिग पहिलो पटक मोफसलमा शुरुवात गरिएकामा खुशी ब्यक्त गर्दै नयाँ खेलाडी उत्पादनका लागि यस प्रकारका लिग अन्यस्थानमा पनि गर्दै जाने एन्फाको योजना रहेको बताउनुभयो ।
एन्फाका वरिष्ठ उपाध्यक्ष पंकज नेम्वाङले नयाँ प्रतिभाहरुका लागि यस प्रकारका खेलहरु कोशेढुंगा सावित हुने धारणा राख्नुभयो । प्रदेश लिग संचालक समिति संयोजक भुपेन्द्र विक्रम थापा पुकारको अध्यक्षतामा उदघाटन कार्यक्रम भएको थियो ।
