बुटवल, ४ भदौ । सवारी दूर्घटना न्यूनिकरणका लागि यातायात मजदुरहरू जिम्मेवार बन्नुपर्नेमा एक कार्यक्रममा वोल्ने वक्ताहरुले जोड दिएका छन् ।
नेपाल यातायात स्वतन्त्र मजदुर संगठन प्रदेश नम्बर पाँचले प्रथम अधिवेशनका अवसरमा बुधबार बुटवलमा आयोजना गरेको कार्यक्रममा सडक दुर्घटना न्यूनीकरण गर्न सबै क्षेत्रको सहकार्य आवश्यक रहेको धारणा ब्यक्त गरेका हुन् ।
कार्यक्रमा नेपाल ट्रेड युनियन महासंघ (जिफन्ट) का राष्ट्रिय अध्यक्ष विनोद श्रेष्ठले पछिल्लो समयमा यातायात दुर्घटना बढेको र दुर्घटनामा यातायात क्षेत्रका मजदुरहरु बढि जिम्मेवार रहेका कुराहरु तथ्याँकले समेत देखाएकाले दुर्घटना न्युनिकरणका लागि यातायात मजदुरहरू जिम्मेवार बन्नुपर्नेमा जोड दिनुभयो । अध्यक्ष श्रेष्ठले सरकारले ल्याएको योगदानमा आधारित सामाजिक सुरक्षा योजना मजदुरहरूमा पनि पूर्णरूपमा कार्यान्वयन हुनेभएकाले सबै जिम्मेवार भएर यो कार्यक्रममा सहभागि हुन आग्रह गर्नुभयो । श्रेष्ठले सडक दुर्घटना न्यूनीकरण गर्न सबै क्षेत्रको सहकार्य आवश्यक रहेकामा समेत जोड दिनुभयो ।
जिफन्टका राष्ट्रिय उपाध्यक्ष कमल गौतमले सामाजिक सुरक्षा योजना पूर्णरुपमा कार्यान्वयन हुनेमा शंका नगर्न आग्रह गर्नुभयो । सामाजिक सुरक्षा योजना कार्यान्वयन हुन नदिन अभियानमा जो कोही लागे पनि त्यो सफल नहुने उहाँले बताउनु भयो ।
संगठनका अध्यक्ष कृष्णप्रसाद कंडेलको अध्यक्षतामा भएको कार्यक्रममा नेपाल यातायात स्वतन्त्र मजदुर संगठनका केन्द्रीय अध्यक्ष भिमज्वाला राईले सडक दुर्घटनाका षियमा निष्पक्ष, पारदर्शी र कानुनसम्मत हिसावले अध्ययन र अनुसन्धान गर्न आवश्यक रहेको बताउनु भयो । उहाँले ट्राफिक नियम उल्लंघन गर्नेलाई गर्ने जरिवाना रकम अबैज्ञानिक रहेको जिकिर गर्दै यसलाई बैज्ञानिक ढंगले निर्धारण गर्नुपर्नेमा जोड दिनुभयो ।
