नवलपरासी, ३ भदौ । पूर्व पश्चिम राजमार्गको अरुणखोलामा अवरुद्ध सडक मंगलबार विहानदेखि एकतर्फी रुपमा सञ्चालनमा आएको छ ।
प्रहरीका अनुसार एकतर्फी सडक खुलाउने र डाइभर्सन मर्मतको काम समेत चलिरहेकोले दिउँसोसम्ममा दुवैतर्फी सडक सञ्चालनमा आउनसक्ने सम्भावना रहेको छ ।
आइतवार सांझ ५ बजेपछि लगातारको वर्षाका कारण अरुणखोलामा पानीको सतह बढेपछि गाडी बगाउने जोखिम हुन नदिन डाइभर्सनमा गाडी गुडाउन रोक लगाइएको थियो ।
३६ घण्टा पछि यातायात सञ्चालनमा आएको छ तर, सवारी साधनहरुको भिडका कारण ठाउँठाउँमा ट्राफिक जाम हुँदा अर्को समस्या थपिने गरेको छ ।
गत बुधबार विहान साढे ४ बजेतिर पूर्वबाट पश्चिमतर्फ जाँदै गरेको ना ६ ख ४७१ नम्बरको ट्रकले पुलको बायाँ साइडमा ठक्कर दिदा पुलको पूर्वदक्षिणको १० मिटर भाग डेढ मिटर गहिरो भासिएको छ ।
पुल भासिएको १ साता वितिसक्दा पनि त्यसलाई मर्मतको लागि कुनै पहल हुन सकेको छैन भने एक सातामा अझै पक्की डाइभर्सन समेत बन्न सकेको छैन ।
यस अघि नवलपरासीमै गैडाकोटको जयश्री खोला, प्रगतिनगरको लोकाहा खोला र दलदलेको भौलाहा खोला भाचिएर महिनौंसम्म यातायात आवागमनमा समस्या भएको थियो ।
पूर्वपश्चिम राजमार्ग अन्तरगत नवलपरासीमा रहेका अधिकांश फलामे पुलहरु ६० बर्ष नाघिसकेका र जीर्ण अवस्थामा पुगेको भए पनि पुल मर्मतको नाममा रंग रोगन लगाउने र नटहरु कसेर मात्र छाड्ने गर्दा बस ट्रकका सामान्य ठक्करबाट पनि पुलहरु भाँचिने गरेको छ । यहाँका अधिकांश पुलहरु फेर्नु पर्ने अवस्थामा रहेका छन् ।
