काठमाडौ । राष्ट्रिय प्रजातन्त्र पार्टीका बरिस्ठ उपाध्यक्ष रवीन्द्र मिश्र धरौटी बुझाएर रिहा हनुभएको छ ।
गत चैत १५ गते काठमाडौंको तीनकुने घटनामा संलग्न भएको आरोपमा मुद्दा खेप्दै आएका मिश्रलाई मंगलबार काठमाडौं जिल्ला अदालतकी न्यायाधीश तारादेवी महर्जनको इजलासले ३ लाख धरौटीमा छाड्न आदेश दिएको हो ।
अदालतको आदेश लगत्तै, मिश्र धरौटी बुझाएर अदालतबाट बाहिरिनु भएको हो । मिश्र आज आफैं काठमाडौ जिल्ला अदालत उपस्थित हुनुभएको थियो ।
मिश्रविरुद्ध यही जेठ ११ गते राज्य विरुद्धको कसुर, आपराधिक उपद्रव, सङ्गठित अपराध र एकीकृत कसुरमा सजाय हुन माग दाबी गरी मुद्दा दर्ता भएको थियो ।
गत चैत १५ गते राजावादीले आयोजना गरेको प्रदर्शन भड्किएर हिंसात्मक बनेको थियो । २ जनाको मृत्यु हुने गरी भएको घटनामा मिश्रले उत्तेजक अभिव्यक्ति दिएको प्रहरीको भनाइ छ ।
सोही घटनामा संलग्न रहेको आरोपमा पक्राउ परेका दुर्गा प्रसाईंलाई भने अदालतले थुनामा पठाउन आदेश दिएको थियो ।
