काठमाडौ, २७ साउन । स्वास्थ्य परीक्षणका लागि सिंगापुर जानुभएका प्रधानमन्त्री केपी शर्मा ओली ९ दिन पछि स्वदेश फर्किनु भएकोछ ।
प्रधानमन्त्री ओली सोमबार दिउँसो थाई एयरको विमानबाट त्रिभुवन विमानस्थल आइपुग्नुभएको हो ।
त्रिभुवन विमानस्थलमा प्रधानमन्त्री ओलीलाई उपप्रधानमन्त्री तथा रक्षामन्त्री ईश्वर पोखरेल, गृहमन्त्री रामबहादुर थापा, सभामुख कृष्णबहादुर महरा, राष्ट्रियसभा अध्यक्ष गणेशप्रसाद तिमिल्सिना, नेकपाका नेता बामदेव गौतमलगायतले स्वागत गर्नुभएको थियो ।
साउन १८ गते सिंगापुर प्रस्थान गर्नुभएका ओलीले १९ गतेदेखि नै नियमित स्वास्थ्य परीक्षण गराउनु भएको थियो । उहां गत शनिबार स्वदेश फर्किने कार्यक्रम तयभए पनि थप दुई दिन बसेर सोमबार मात्र स्वदेश फर्किनुभएको हो ।
सत्तारूढ नेपाल कम्युनिस्ट पार्टी (नेकपा)का अध्यक्षसमेत रहनुभएका ओलीको सिंगापुरस्थित नेशनल युनिभर्सिटी हस्पिटलमा स्वास्थ्य परीक्षण गरिएको हो । १२ वर्षअघि भारतमा मिर्गौला प्रत्यारोपण गरेपछि ओलीले सिंगापुरमा नियमित स्वास्थ्य परीक्षण गराउँदै आउनुभएको छ । प्रधानमन्त्री ओलीसँग पत्नी राधिका शाक्य, प्रमुख राजनीतिक सल्लाहकार विष्णु रिमाल, निजी चिकित्सक डा. दिव्या सिंह लगायतको टोली सिंगापुर गएको थियो ।
