साउन महिनाको अन्तिम सोमबार शिवालयहरुमा श्रद्दालुहरुको भीड

बुटवल, २७ साउन । आज साउन महिनाको अन्तिम सोमबार । देशभरका शिवालयहरुमा श्रद्धालु भक्तजनहरुको बिहानै देखि घुइचो लागेको छ ।
साउन महिनाको हरेक सोमबार ब्रत बसेर शिवको पूजा गर्दै आएका महिलाहरुले आज विधिपूर्वक व्रत समाप्त गर्दछन् । साउनको सोमबार भगवान शिवको प्रिय बार भएकाले यस दिन श्रद्धालुहरु व्रत, पूजापाठ, दान लगायतका काम गर्ने गर्दछन् ।
रुपन्देही जिल्ला सैनामैना नगरपालिकामा अवस्थित स्वयं उत्पत्तिमान पर्रोहा परमेश्वर शिव ज्योतिर्लिङ्ग बोलबम धाममा पनि सोमबार बिहानै देखि नै भक्तजनको घुइचो लागेको थियो । अन्य सोमबार जस्तै आज पनि श्रद्धालु भक्तजनहरुले बिहानै देखि लाईनबद्ध भएर बोलबम धाम मन्दिरमा जलार्पण गरेका पर्रोहा परमेश्वर शिव ज्योतिर्लिङ्ग बोलबम धामका अध्यक्ष रामबली चौधरीले जानकारी दिनुभयो ।
विशेष रुपमा साउन महिनाको सोमबार र शनिबारका दिन धाममा हजारौं भक्तजनहरु आउने गरेको धामका को घुइचो लाग्ने गरेको धामका अध्यक्ष चौधरीले जानकारी दिनुभयो । आज साउनको महिनाको अन्तिम सोमबार परेकाले पनि भक्तजनहरुको बिहानदखि नै घुइचो लागेको उहांले बताउनु भयो ।
बोल बम धाममा देवघाट, रिडी, त्रिबेणी, लक्ष्मण घाट लगायत विभिन्न धार्मिक स्थलका नदी तलाउहरुवाट बिशेष विधिपुर्वक ल्याइएको जल जलार्पण गर्ने गरिन्छ ।
आज पर्रोहा परमेश्वर शिव ज्योतिर्लिङ्गमा जस्तै यस क्षेत्रका मुक्तिनाथ धाम, मोेक्ष धाम, नीलकण्ठ बाबा धाम, श्रृँगेश्वर धाम, तल्लो र माथिल्लो सिद्धबाबा धामलगायत विभिन्न शिवालय मन्दिरहरुमा पनि श्रद्धालु भक्तजनहरुको घुइचो लागेको छ ।
यस्तै काठमाडौंको पशुपति, भक्तपुरको डोलेश्वर, ललितपुरको कुम्भेश्वर, पूर्वको महादेव भनेर चिनिने हलेसी, सुनसरीको पिण्डेश्वर, म्याग्दीको गलेश्वर, कपिलवस्तुको कुशेश्वर, पर्वतको गुप्तेश्वर, जनकपुरको कपिलेश्वर, जलेश्वरको सिरेश्वर र कलानेश्वर लगायतका शिवालयहरुमा पनि बिहानैदेखि भक्तजनको घुइँचो लागेको छ । चितवन, नवलपरासी र तनहुँको संगमस्थल देवघाटधाममा पनि साउनको अन्तिम सोमबार पूजा गर्ने र बोलबम मेला भर्नेहरुको घुईंचो लागेको छ ।
पहेंलो बस्त्र लगाएका श्रद्धालुुहरु विहानैदेखि यस्ता तिर्थस्थलहरुमा लामबद्ध भएका थिए । खासगरि साउन महिनाको सोमबार बर्त बस्दा धेरै खालका फाईदा हुने धार्मिक विश्वाश पनि रहेको छ । यसका कारणले पनि अधिकांश महिलाहरु सोमबार निराहार वर्त बस्ने गर्दछन् । वर्त बसेका वर्तालुहरुका कारणले पनि शिवालयहरुमा बढि घुइचो लाग्ने गरेको हो ।