बुटवल । नेपाली काँग्रेसले रुपन्देहीको भैरहवामा दुई दिने प्रशिक्ष तथा अभिमुखीकरण कार्यक्रमको आयोजना गरेको छ । नेपाली कांग्रेस केन्द्रीय नीति तथा अनुसन्धान प्रतिष्ठानको आयोजनामा कार्यक्रम गर्न लागिएको हो ।
सोमबार र मंगलबार दुई दिनसम्म भैरहवामा हुने कार्यक्रममा देशभरका क्षेत्रिय सभापतिहरु तथा प्रशिक्षण शाखा प्रमुखहरुको सहभागिता रहने छ ।
नेपाली कांग्रेसको केन्द्रीय नीति तथा अनुसन्धान प्रतिष्ठानले गर्ने दुई दिने प्रशक्षिण कार्यक्रमका लागि पार्टी सभापति शेरबहादुर देउवा आज रुपन्देही आउनुभएको छ । सभापति संगै परराष्ट्र मन्त्री तथा काँग्रेस नेतृ आरजु राणा देउवा पनि रुपन्देही आउनु भएको छ । देशभरका क्षेत्रीय सभापतिहरुको प्रशिक्षण कार्यक्रमलाई सम्बोधन गर्न उहांहरु आज विहान भैरहवा आइपुग्नुभएको हो ।
प्रशिक्षण कार्यक्रमका लागि काँग्रेसका अन्य शिर्षनेताहरु आइतबार नै रुपन्देही आएर बसेका छन् । महामन्त्रीद्वय गगन कुमार थापा, विश्वप्रकाश शर्मा, उपसभापति पूर्णबहादुर खड्का, गृहमन्त्री तथा काँग्रेस केन्द्रीय सदस्य रमेश लेखक, नेता डा.शेखर कोइराला, कृष्ण सिटौला, विमलेन्द्र निधि, नेता बालकृष्ण खाँण लगायतका शिर्षतहका नेताहरु आइतबारनै रुपन्देही आएपछि काँग्रेस नेता कार्यकर्ताहरुको भेटघाट तथा चहलपहल बढेको छ ।
भैरहवाको पटवा हलमा (महेन्द्र सभा गृह) विहान ११ बजेदेखि हुने प्रशिक्षण कार्यक्रममा देशभरबाट क्षेत्रीय सभापतिहरुसहित प्रतिनिधिहरु सहभागि भएका काँग्रेस रुपन्देहीले जनाएको छ ।
१६५ संघीय निर्वाचन क्षेत्रमध्ये १३० निर्वाचन क्षेत्रबाट क्षेत्रीय सभापति र प्रशिक्षण शाखा प्रमुख गरी २६० जना र एउटा मात्र संघीय निर्वाचन क्षेत्र रहेका ३५ जिल्लाका ७० वटा प्रदेश सभा निर्वाचन क्षेत्रबाट ७० जना क्षेत्रीय सभापति गरी ३३० जना प्रशिक्षण कार्यक्रममा सहभागी हुने छन् ।
